Брюссель. 5 маусым. ИНТЕРФАКС – Дүниежүзілік денсаулық сақтау ұйымы Эбола безгегімен күреске 518 млн АҚШ долларын бөлмек. Бұл туралы ұйымның бас директоры Тедрос Адханом Гебрейесус мәлімдеді.
«Біз жұмысты нөлден бастап отырған жоқпыз. Бұл жоспар аурудың бұрынғы өршулерімен және соңғы денсаулық сақтау саласындағы төтенше жағдайлармен күрес барысында жинақталған тәжірибеге негізделген», – деді ол жұма күні журналистерге.
ДДҰ басшысының айтуынша, Эболаға қарсы іс-қимыл жоспары Африканың ауруларды бақылау және алдын алу орталықтарымен бірлесіп жүзеге асырылады. Бағдарлама маусымнан қарашаға дейінгі кезеңді қамтиды.
«Эбола індетін тежеу үшін саяси ерік-жігер, тұрақты қаржыландыру және жергілікті деңгейде сенімге негізделген өзара іс-қимыл қажет», – деп атап өтті Гебрейесус.
Африкада Бундибуджио штаммынан туындаған Эбола безгегінің жаңа ірі өршуі тіркеліп отыр. Маусым айындағы деректер бойынша, өңірде ауру жұқтырудың мыңнан астам ықтимал жағдайы анықталып, 200-ден астам адам қайтыс болған.
Індеттің негізгі таралу ошақтары дәстүрлі түрде Орталық және Батыс Африканың қалың орманды аймақтарында орналасқан.
