Вашингтон. 7 маусым. ИНТЕРФАКС – АҚШ президенті Дональд Трамп Иранға қарсы операциялар үшін Таяу Шығыста шоғырландырылған әскери күштерді әзірге тұрақты орналасу орындарына қайтаруды қажет деп санамайтынын айтты.
NBC News телеарнасына берген сұхбатында ол әскерді әкету қазіргі жағдайда дұрыс шешім болмайтынын мәлімдеді.
«Әскерді шығару көрегендікке жатпайтын шешім болар еді, өйткені олардың көмегі бізге әлі де қажет болуы мүмкін», – деді Трамп.
Сонымен қатар АҚШ президенті Иранға қарсы әскери соққыларды қайта бастау қажеттілігі туындауы екіталай деп есептейтінін жеткізді.
«Дегенмен келісімге қол жеткізілгенге дейін әскерлер сол жерде қала береді деп ойлаймын», – деді ол.
Трамптың айтуынша, өңірде әскери контингентті ұстап тұруға жұмсалатын шығын көлемі айтарлықтай емес.
NBC News мәліметінше, қазіргі уақытта Иран маңында шамамен 50 мың америкалық әскери қызметкер орналастырылған.
Сұхбат барысында Трамп АҚШ Иранның әскери әлеуетін толықтай жойды деген пікірін тағы да қайталады.
Оның айтуынша, Иранның қолында аз ғана зымырандар мен ұшқышсыз ұшу аппараттары қалған.
АҚШ президентінің бағалауынша, Иранның соғысқа дейінгі зымыран арсеналының шамамен 21–22 пайызы ғана сақталған.
