Астана. 6 маусым. ИНТЕРФАКС-ҚАЗАҚСТАН – Қазақстанда зейнетақы жинақтарын мерзімінен бұрын пайдалану үшін ең төменгі жеткіліктілік шегін (ЖШ) есептеудің жаңа әдістемесі күшіне енді. Бұл туралы Бірыңғай жинақтаушы зейнетақы қоры (БЖЗҚ) баспасөз қызметі хабарлады.
Сенбі күні жарияланған ақпаратқа сәйкес, енді Қазақстан азаматтарының зейнетақы шотында 20 жаста – 6,67 млн теңге, 30 жаста – 9,75 млн теңге, 40 жаста – 13,37 млн теңге, 50 жаста – 17,59 млн теңге, ал 60 жаста – 22,5 млн теңге көлемінде жинағы болуы тиіс.
Егер жинақталған қаражат мөлшері белгіленген шектен төмен болса, зейнетақы жинақтарының бір бөлігін мерзімінен бұрын пайдалану мүмкін болмайды.
БЖЗҚ мәліметінше, жеткіліктілік шектері салымшының жасына қарай 79 пайызға және одан да жоғары деңгейде ұлғайтылған. Зейнет жасына жақындаған сайын болашақ зейнетақы төлемдерінің мөлшеріне қойылатын талаптар артып, зейнетақы шотында сақталуы тиіс қаражат көлемі де көбейеді.
Осыған байланысты зейнет жасына таяған азаматтар үшін жеткіліктілік шегі екі еседен астам өскен. Бұл олардың зейнетақы жинақтары шотта қалып, әрі қарай инвестицияланып, болашақтағы төлем көлемінің артуына мүмкіндік береді.
Қордың түсіндіруінше, бұрынғы әдістеме бойынша қаражатты мерзімінен бұрын алған жағдайда зейнетақы төлемдері медианалық жалақының шамамен 15 пайызы деңгейінде болар еді. Жаңа әдістеме бойынша бұл көрсеткіш шамамен 40 пайызға дейін жетеді.
Сонымен қатар тұрғын үй жағдайын жақсарту немесе емделу мақсатында зейнетақы жинақтарының бір бөлігін пайдалану құқығы сақталады. Зейнетақысы бұрынғы табысының кемінде 40 пайызын өтейтін зейнеткерлер жинақтарының 50 пайызына дейін тұрғын үй және емделу мақсаттарына пайдалана алады.
Сондай-ақ зейнетақы аннуитеті шартын жасасқан азаматтар мен еңбек сіңірген жылдары үшін мемлекеттен зейнетақы алатын тұлғалар зейнетақы шотындағы қалған қаражатты толық көлемде пайдалана алады.
Қазақстанда ерлер үшін зейнетке шығу жасы – 63 жас, әйелдер үшін – 61 жас. Әйелдердің зейнет жасы 2027 жылдың соңына дейін осы деңгейде сақталады. Ал 2028 жылдан бастап әйелдер де 63 жаста зейнетке шығатын болады.
