БРЮССЕЛЬ. 8 қыркүйек. ИНТЕРФАКС — Еуропалық одақ басып алынған Палестина аумағындағы Израиль қоныстары халықаралық құқыққа қайшы деген ұстанымын тағы да растады.
«Бұл қоныстар бейбітшілік орнатуға және екі мемлекеттің қатар өмір сүруіне негізделген шешімді жүзеге асыруға кедергі келтіреді. Біз Израильді қоныстарды кеңейтуді тоқтатуға үнемі шақырып келеміз. Сондай-ақ премьер-министр Биньямин Нетаньяхудың Иордан өзенінің Батыс жағалауындағы заңсыз қоныс орындарын жою жөніндегі тапсырмасының орындалуын мұқият қадағалаймыз», — деді сейсенбі күні Брюссельде өткен брифингте ЕО сыртқы саясат ведомствосының басшысы Кая Калластың ресми өкілі Ануар әл-Ануни.
Ол Еуроодақтың адам құқықтарына қатысты жаһандық санкциялық тәртіп аясында радикал көзқарастағы қоныстанушылар мен олардың ұйымдарына шектеу енгізгенін еске салды. Қазір санкциялар 12 адам мен 9 ұйымға қатысты қолданылады.
Ануар әл-Анунидің айтуынша, жаңа санкциялар жөніндегі ұсыныстар да талқыланып жатыр және ЕО Кеңесінің қарауында.
Сондай-ақ ол Еурокомиссияның Израиль қоныстарында өндірілген тауарларды Еуроодаққа әкелуге тыйым салу туралы ұсынысына қатысты пікірталасқа тоқталды.
«Шілде айында өткен ЕО Сыртқы істер кеңесінің соңғы ресми отырысында ұсынылған нұсқалардың ешқайсысы бойынша ортақ шешімге келу мүмкін болмады. Еурокомиссия ұсынған шаралардың бірде-бірі жеткілікті қолдау тапқан жоқ. Сондықтан бұдан әрі қандай қадам жасау керектігін мүше мемлекеттер өздері шешуге тиіс», — деді ЕО өкілі.
