ИЕРУСАЛИМ. 8 қыркүйек. ИНТЕРФАКС — Біріккен Араб Әмірліктерінің басшылығы 2023 жылғы 7 қазандағы шабуылдан бірнеше күн бұрын Израиль премьер-министрі Биньямин Нетаньяхуға ХАМАС-тың ауқымды шабуыл әзірлеп жатқаны туралы ескерткен. Бұл жөнінде сейсенбі күні «Гаарец» басылымы жазды.
Басылымның мәліметінше, бұл дерек журналистер Шломи Эльдар мен Рут Юваль жазған кітапта келтірілген. Авторлар кітаптағы мәліметтерді Израильде және басқа елдерде тұратын бірнеше ондаған дереккөзден алғанын айтады.
Кітапта 2023 жылдың қыркүйек айының соңында Нетаньяху БАӘ президенті Мұхаммед бен Заид Әл Нахаянмен телефон арқылы 45 минут сөйлескені жазылған.
Сол әңгімеде БАӘ президенті ХАМАС жетекшісі Яхья Синвардың Израильге қарсы ірі шабуыл жоспарлап отырғанын ескерткен. Алайда Нетаньяху Газадағы жағдай Израильдің бақылауында екенін айтып, ХАМАС қандай да бір әрекетке барса, ол Батыс жағалауда болуы ықтимал деген. Сондай-ақ Израильдің «кез келген жағдайға дайын» екенін жеткізген.
Кітап авторларының жазуынша, БАӘ басшылығы ХАМАС-тың жоспары туралы Синвардың өзінен білген. Ол палестиналық тұтқындарды босату жөніндегі Израильмен келіссөздердің ілгерілемей жатқанына наразы болған.
Нетаньяху тарапынан тиісті әрекет болмаған соң, БАӘ президенті жағдайға қатты алаңдап, сол кездегі АҚШ Орталық барлау басқармасының директоры Уильям Бернспен телефон арқылы сөйлескені де кітапта айтылады.
«Гаарец» дерегіне қарағанда, Нетаньяху БАӘ-ден алған ақпаратты Израильдің қауіпсіздік қызметтерінің басшыларына жеткізбеген және ескертуге байланысты ешқандай шара қолданбаған.
2023 жылғы 7 қазанда ХАМАС Израильге шабуыл жасады. Осыдан кейін Израиль армиясы Газа секторында ХАМАС-қа қарсы әскери операция бастады.
