Астана. 26 маусым. ИНТЕРФАКС-ҚАЗАҚСТАН – Қазақстан Парламенті Мәжілісі жұма күні өткен жалпы отырыста Сенат енгізген түзетумен келісе отырып, «Экология мәселелері және экономиканың жекелеген салаларын жетілдіру бойынша кейбір заңнамалық актілерге өзгерістер мен толықтырулар енгізу туралы» заңды қабылдады.
Депутаттардың айтуынша, Сенат ұсынған түзету заңның тұжырымдамасын өзгертпейді және оның мазмұнын нашарлатпайды.
«Түзету Қазақстанның климаттың өзгеруіне қарсы жаһандық іс-қимылға қосатын ұлттық үлесі аясында мемлекет резервіне қалдырылатын көміртек бірліктерінің үлесін азайтуға бағытталған», – деп хабарлады Мәжілістің баспасөз қызметі.
Бұған дейін заң жобасын қарау барысында Экологиялық кодекстің Париж келісімінің нарықтық тетіктері негізінде іске асырылатын жобалардың нәтижелерін Қазақстанның ұлттық үлесін орындау мақсатында есепке алу тәртібін реттейтін жаңа 288-1-бабы қайта қаралған болатын.
Заңға сәйкес, экологиялық ақпаратты жинақтайтын бірыңғай ұлттық экологиялық деректер банкі құрылады. Оның құрамына мониторинг жүйелерінің мәліметтері мен өндірістік экологиялық бақылау нәтижелері енгізіледі. Бұл ақпараттың ашықтығын қамтамасыз етіп, бақылау тиімділігін арттыруға мүмкіндік береді.
Сонымен қатар құжатта орман және жайылым көміртек офсеттері институтын енгізу көзделген. Бұл орман өсіру жобаларына жеке инвестициялар тартуға және еліміздің климаттық міндеттемелерін орындауға ықпал етеді.
Заң қалдықтарды басқару жүйесін де жетілдіреді.
Рұқсатсыз қоқыс үйінділерін жою жөніндегі өкілеттіктер жергілікті атқарушы органдарға беріледі. Бұдан бөлек, қатты тұрмыстық қалдықтарды жинау, тасымалдау, сұрыптау және көму саласындағы тарифтік саясат өңірлік ерекшеліктерді ескере отырып қалыптастырылады.
Құжатта ұлттық гидрометеорологиялық қызметтің жұмысы да жетілдіріледі. Атап айтқанда, «Қазгидромет» республикалық мемлекеттік кәсіпорны атқаратын мемлекеттік функциялар мен бәсекелестік негізде көрсетілетін қызметтер нақты ажыратылады. Бұл бюджет қаражатын тиімді пайдалануға және қызмет көрсету сапасын арттыруға мүмкіндік береді.
Заңда белгіленген нормадан тыс шығарындылар үшін жауапкершілік айқындалып, мұндай эмиссияларды есептеу тәртібі нақтыланған.
Сонымен қатар қайта өңделген шикізатты пайдаланатын отандық өндірушілерді ынталандыру шаралары енгізіледі. Бұл қайта өңдеу өнеркәсібінің дамуына және тұйық циклді экономиканы қалыптастыруға ықпал етеді.
Жалпы алғанда, заң экология саласындағы мемлекеттік саясаттың тиімділігін арттыруға, табиғи ресурстарды ұтымды пайдалануға және мемлекет, бизнес пен қоғам арасындағы жауапты әріптестікті нығайтуға бағытталған.
Құжат Мемлекет басшысының қол қоюына жолданды.
