Вашингтон. 20 шілде. ИНТЕРФАКС – Қытай Халық Республикасының Төрағасы Си Цзиньпиннің Вашингтонға мемлекеттік сапары бұрынғыдай қыркүйек айына жоспарланған. АҚШ президенті Дональд Трамптың Қытайды америкалық сайлауға араласуға тырысты деп айыптаған мәлімдемелерінен кейін де бұл жоспарға өзгеріс енгізілген жоқ. Бұл туралы АҚШ мемлекеттік хатшысы Марко Рубио мәлімдеді.
«Біздің күтуімізше, бұл сапар қыркүйекте өтеді. Қытай тарапы сапарға дайындық жұмыстарын жалғастырып, өз мамандарын жіберіп жатыр. Өзге ақпарат алған жоқпын», – деді Рубио АСЕАН саммитіне қатысу үшін Манилаға аттанар алдында журналистерге.
Өткен жұма күні америкалықтарға жасаған үндеуінде Дональд Трамп Қытайды АҚШ-тағы сайлау нәтижелеріне бірнеше рет ықпал етуге әрекет жасады деп айыптады. Сонымен қатар ол елдің сайлау жүйесін шетелдік араласудан қорғау үшін тиісті шаралар қабылданатынын мәлімдеді.
Өз кезегінде Қытай Сыртқы істер министрлігі бұл айыптауларды жоққа шығарды.
«Қытайдың бұған мүддесі жоқ және ол ешқашан АҚШ-тағы сайлауға араласқан емес», – деді Қытай СІМ ресми өкілі Линь Цзянь.
Дональд Трамп 13–15 мамыр аралығында Қытайға ресми сапармен барған болатын. Сол кезде АҚШ президенті Си Цзиньпин мен оның жұбайы Пэн Лиюаньды күзде Вашингтонға мемлекеттік сапармен келуге шақырған. Кейін Қытайдың Сыртқы істер министрлігі ҚХР төрағасының бұл шақыруды қабылдағанын хабарлаған.
