Вашингтон. 11 тамыз. ИНТЕРФАКС – АҚШ президенті Дональд Трамп балаларға ұсынылатын вакциналар санын 18-ден 11-ге дейін қысқартуды көздейтін жарлыққа қол қойды. Бұл туралы сейсенбі күні Ақ үй хабарлады.
«Жарлықта барлық балаға 11 ауруға қарсы вакцина алу ұсынылады. Ал 2024 жылы АҚШ-тың Ауруларды бақылау және алдын алу орталықтары 18 ауруға қарсы екпе алуды ұсынған болатын», – делінген хабарламада.
Жаңа ұсынымдарға сәйкес, барлық бала қызылша, эпидемиялық паротит, қызамық, дифтерия, сіреспе, көкжөтел, полиомиелит, гемофильді инфекция, пневмококк инфекциясы, адам папиллома вирусы және желшешекке қарсы екпе алуы тиіс. Қалған вакциналар қауіп тобына кіретін балаларға ұсынылады немесе оларды салдыру туралы шешімді ата-аналар дәрігермен бірге қабылдайды.
Сонымен қатар жарлықта қызылша, эпидемиялық паротит және қызамыққа қарсы біріктірілген MMR вакцинасын үш бөлек екпеге бөліп салу ұсынылған.
Қазіргі уақытта АҚШ-та мұндай форматтағы вакциналар қолжетімді емес. Денсаулық сақтау саласының сарапшылары екпелерді бөлек салу балалардың қауіпті жұқпалы аурулардан қорғаныссыз қалатын кезеңін ұзартады деп ескертті.
Трамп Ақ үйдің Сопақ кабинетінде сөйлеген сөзінде вакциналарға қатысты ғылыми тұрғыда расталмаған бірқатар пікір айтты. Атап айтқанда, ол вакцинация мен аутизм жағдайларының көбеюі арасында байланыс болуы мүмкін деген болжам келтірді.
«Осыдан ондаған жыл бұрын балалар қазіргімен салыстырғанда әлдеқайда аз вакцина алатын. Ол кезде адамдардың денсаулығы әлдеқайда жақсы болды және, әрине, қазіргідей аутизм көрсеткіші жоғары болған жоқ», – деді Трамп.
Президенттің жарлығы медицина қауымдастығы тарапынан қатаң сынға ұшырады.
«АҚШ-та қызылша ауруы соңғы 35 жылдағы ең жоғары деңгейге жетіп, суық тию мен тұмау маусымы жақындап келе жатқан кезде вакцинацияға қатысты бүгінгі жарлық алаңдаушылық туғызып қана қоймай, қауіп те төндіреді», – деді Америка педиатрия академиясының президенті Эндрю Расин.
Оның айтуынша, миллиондаған адам қамтылған ондаған зерттеу вакциналар мен аутизм арасында ешқандай байланыс жоқ екенін көрсеткен. «Соған қарамастан федералдық билік өкілдері әлдеқашан теріске шығарылған бұл пікірді әлі де алға тартып, отбасыларды алаңдатуды жалғастырып отыр», – деді ол.
Республикалық сенатор Билл Кэссиди де Трамптың жарлығын дұрыс емес деп бағалады.
«Ата-аналар вакцина мәселесінде атқарушы биліктің нақты емес жарлықтарына емес, баласын емдейтін педиатрдың кеңесіне құлақ асуы керек. Бұл – дұрыс емес», – деп жазды ол X әлеуметтік желісінде.
