Мәскеу. 12 тамыз. ИНТЕРФАКС – Шілде айында әлемдік мұнай ұсынысы тәулігіне 2,4 млн баррельге артып, 101,5 млн баррельге жетті. Бұл туралы Халықаралық энергетикалық агенттіктің (ХЭА) ай сайынғы есебінде айтылған.
Өсім негізінен Иран мен АҚШ арасындағы қақтығыс кезінде шектелген Парсы шығанағы елдеріндегі өндірістің қалпына келуі есебінен қамтамасыз етілді.
ХЭА бағалауынша, өткен айда ОПЕК+ елдеріндегі мұнай өндіру көлемі тәулігіне 1,8 млн баррельге артты. Ал альянсқа кірмейтін елдерде өндіріс тәулігіне 0,6 млн баррельге өсті. Бұған ең алдымен Катардан жеткізілімнің қалпына келуі ықпал етті.
«Алайда ай соңында Иран мен АҚШ арасындағы өзара түсіністік туралы меморандумның жүзеге аспай қалуынан кейін шиеленістің қайта күшеюі, сондай-ақ хуситтермен байланысты Сауд Арабиясының танкерлері мен энергетикалық инфрақұрылымына жасалған шабуылдар Парсы шығанағы елдерінің мұнай өндірісін қалпына келтіруіне қауіп төндіріп отыр», – делінген есепте.
Геосаяси тәуекелдердің күшеюіне байланысты ХЭА 2026 жылы әлемдік мұнай жеткізілімінің төмендеуіне қатысты болжамын қайта қарады. Агенттік бұған дейін тәулігіне 3,7 млн баррельге қысқарады деп күтсе, енді төмендеу көлемін 4,3 млн баррель деп бағалап отыр. Ал келесі жылға арналған өсім болжамы тәулігіне 7,5 млн баррельден 8,3 млн баррельге дейін ұлғайтылды.
Осылайша, ХЭА 2026 жылы әлемдік мұнай жеткізілімінің көлемі тәулігіне 102 млн баррель болады деп болжап отыр. Бұған дейінгі болжам 102,6 млн баррель болған. 2027 жылы көрсеткіш тәулігіне 110,3 млн баррельге жетеді деп күтілуде. Өткен айдағы болжам 110,1 млн баррель еді.
ХЭА бағалауынша, 2026 жылы ОПЕК+ елдеріндегі мұнай өндірісі тәулігіне 5 млн баррельге төмендеп, 41,8 млн баррельді құрайды. Ал келісімге қатыспайтын елдер өндірісті шамамен тәулігіне 0,7 млн баррельге арттырып, 60,2 млн баррельге жеткізеді. Катар мен БАӘ-дегі өндірістің тоқтауынан туындайтын шығын Солтүстік және Оңтүстік Америка елдеріндегі өндірістің өсуі есебінен өтеледі. Олардың қатарында АҚШ, Канада, Бразилия, Гайана және Аргентина бар.
ХЭА болжамынша, 2027 жылы ОПЕК+ елдеріндегі мұнай өндірісі тәулігіне 5,8 млн баррельге артып, 47,6 млн баррельге жетуі мүмкін. Ал альянсқа кірмейтін елдер өндірісті тәулігіне 2,5 млн баррельге ұлғайтып, 62,7 млн баррельге жеткізеді.
