Мәскеу. 13 тамыз. ИНТЕРФАКС – «Росатом» «Пакш-2» атом электр станциясының жобасы бойынша келіссөз жүргізуге дайын, алайда Венгрияның жаңа үкіметінен әзірге тиісті өтініш түскен жоқ. Бұл туралы мемлекеттік корпорацияның бас директоры Алексей Лихачев «Страна Росатом» корпоративтік басылымына мәлімдеді.
«Бұған дейін де айтқанымыздай, біз келіссөзге дайынбыз. Сондай-ақ Венгрия басшылығында туындайтын кез келген сұраққа нақты деректер мен көрсеткіштер негізінде жауап беруге әзірміз. Әзірге бізге ешқандай өтініш түскен жоқ», – деді Лихачев.
Оның айтуынша, «Росатом» Венгрияда елдің энергетикалық қауіпсіздігі мен атом энергетикасының рөліне қатысты талқылау прагматикалық әрі сындарлы сипатта өтеді деп үміттенеді.
«Көптеген сарапшының пікірінше, «Пакш-2» АЭС жобасының негізгі параметрлерін қайта қарау энергоблоктарды пайдалануға беру мерзімін айтарлықтай кейінге шегеріп қана қоймай, оның қаржылық моделін түбегейлі өзгертуді де талап етеді. Бұл жалпы елдің дамуына және оның азаматтарының әл-ауқатына әсер етпей қоймайды», – деді корпорация басшысы.
Лихачев «Пакш-2» АЭС құрылыс жұмыстарының барысына да тоқталды.
«Құрылыс жұмыстары қарқын алды және біз венгриялық тапсырыс берушімен келісілген жоспарды ұстанып келеміз», – деді ол.
«№6 энергоблокта «ядролық аралдың» іргетас шұңқырын қазу жұмыстары жүргізіліп жатыр. Жұмыс қарқыны жоспарға сәйкес келеді. Жыл соңына дейін бұл блокта да «алғашқы бетон» құюға дайындықты бастауды жоспарлап отырмыз», – деді Лихачев.
2009 жылы Венгрия парламенті кеңестік жоба бойынша салынған және елдегі жалғыз жұмыс істеп тұрған «Пакш» АЭС-ін кеңейтуді мақұлдады. Жоба №5 және №6 екі жаңа энергоблок салуды көздейді. Сол кезде жобаның құны 12,5 млрд еуроға бағаланған.
«Пакш-2» АЭС-інің №5 энергоблогына алғашқы бетон құю рәсімі 2026 жылғы ақпанда өтті.
Бұған дейін Лихачев Венгриядағы парламенттік сайлау қорытындысына қатысты пікір білдіріп, «Росатомның» «Пакш-2» АЭС жобасы, соның ішінде оның құны жөніндегі кез келген сұраққа жауап беруге дайын екенін айтқан.
«Сайлауда жеңіске жеткен партияның басшысы (Петер Мадьяр – ИФ) біздің жобамызды бірнеше рет атап өтті, оның ішінде жоба құнына қатысты біршама сын да айтты. Біз ашықпыз және осы жобаны жүзеге асыруда өзара сенім болады деп үміттенеміз», – деген еді Лихачев.
Мамыр айында Лихачев «Росатомның» «Пакш-2» АЭС құрылысын жеделдетуге мүдделі екенін хабарлаған.
«Үкіметпен (Венгрия үкіметімен – ИФ) бірлесіп жобаны қайта қарап, жұмыстарды жеделдете аламыз деп үміттенеміз. Түрлі себептерге байланысты осы уақытқа дейін жұмыс біз қалағандай жылдам жүрген жоқ», – деді ол.
