Астана қаласының прокуратурасы хабарлайды: «Бұған дейін бір жылға көлік жүргізу құқығынан айырылған Ақмола облысының тұрғыны мас күйінде қайтадан рөлге отырған. Сотта ол бір күн бұрын ұлттық сусын — қымызды көп мөлшерде ішкенін түсіндірді. Мемлекеттік айыптаушы сотта айыпталушының кінәсін дәлелдейтін барлық айғақты ұсынды. Сот оның кінәсін мойындағанын және кәмелетке толмаған балалары барын ескеріп, бір жылға бас бостандығынан айыру және өмір бойына көлік жүргізу құқығынан айыру жазасын тағайындады. Үкім заңды күшіне енді. Елорда прокуратурасы азаматтарды мас күйінде көлік жүргізбеуге шақырады. Өйткені мұндай әрекет адамдардың өмірі мен денсаулығына нақты қауіп төндіріп, қатаң жауапкершілікке әкеп соғады».
Еуразия24 пікірі:
2025 жылы маусымда Қазақстан Конституциясының 30 жылдығына орай рақымшылық жариялау мәселесі алғаш көтеріле бастағанда, бір топ қазақстандық жүргізуші жазаны жеңілдетуді сұрап петиция жариялаған еді. Олардың уәжі бойынша, көлік жүргізу құқығынан жеті жылға айыру, оған қоса әкімшілік қамауға алу тым қатаң жаза-мыс: бір рет қателескеннен не болыпты? Алайда мас күйінде көлік жүргізгендерді осылайша ақтауға тырысқандарға Ішкі істер министрлігі нақты жауап берді: мұндай құқық бұзушыларға ешқандай рақымшылық болмайды.
Ал мына жағдай кей адамдардың өзгенің басынан өткенінен сабақ ала бермейтінін тағы көрсетті. Заңды да, жауапкершілікті де елемеген жүргізуші енді көлік тізгініне өмір бойы отыра алмайды, ал жасаған әрекеті үшін жазасын колонияда өтейді. Бәлкім, осы жаза оған тиісті сабақ болар.
Бұл өзгелерге де ескерту болуы тиіс. Мас күйінде қоғамға қауіп төндіретін қылмысқа саналы түрде барғандарға мемлекет жеңілдік жасамайды. Біздің ойымызша, осындай бірнеше қатаң үкім «мен бәрібір ұсталмаймын» деп ойлайтындардың райынан қайтып, әрекетінің салдарын алдын ала таразылауына түрткі болуы мүмкін.
