Брюссель. 16 қазан. ИНТЕРФАКС – Еуропалық одаққа мүше мемлекеттердің басшылары 15 қазанда 2028–2034 жылдарға арналған ортақ бюджетті талқылау үшін алғаш рет бетпе-бет кездесті. Жиында Ирландияның бюджетті 141 млрд еуроға қысқарту жөніндегі соңғы ұсынысы қолдау таппады. Бұл туралы EUobserver басылымы хабарлады.
«Қазіргі уақытта ЕО Кеңесіне төрағалық етіп отырған Дублин ұзақ мерзімді бюджетті 141 млрд еуроға дейін қысқартуды ұсынды. Бұл Еуропалық комиссия ұсынған көлемнен шамамен 8%-ға аз. Алайда бастама әртүрлі себептермен ешбір тараптың көңілінен шықпады. Енді Еуропалық кеңес төрағасы Антониу Коштаға ЕО басшыларының 26 қарашада Брюссельде өтетін келесі кездесуіне дейін тараптарды қанағаттандыратын жаңа ұсыныс әзірлеу міндеті жүктелді», – деп жазды басылым.
Кошта желтоқсан айында келісімге қол жеткізу қажет деп есептейді және мүше мемлекеттерді бұл мәселеге жауапкершілікпен қарауға шақырды. Алайда ЕО елдерінің ұстанымдары әртүрлі. Мәселен, Дания қорғанысқа, шекара қауіпсіздігін қамтамасыз етуге, заңсыз көші-қонмен күресуге және экономиканың бәсекеге қабілеттілігін арттыруға көбірек қаржы бөлуді маңызды санайды.
«Еуропалық одақ екі топқа бөлінді. Бюджет шығындарын үнемдеуді жақтайтын Германия, Австрия, Дания, Финляндия, Нидерланд және Швеция шығыстарды тағы бірнеше жүз миллиард еуроға қысқартуды талап етіп отыр. Олар ең алдымен ауыл шаруашылығына және ЕО елдері арасындағы даму алшақтығын азайтуға бағытталған қорларға бөлінетін қаржыны қысқартуды ұсынады. Ал өздерін «бірлік саясатының достары» деп атайтын ЕО-ның өзге 17 мемлекеті мұндай үнемдеуге қарсы», – деп атап өтті EUobserver.
Басылымның жазуынша, биыл келісімге келу аса маңызды. Әсіресе көктемде президент сайлауы өтетін Франция президенті Эмманюэль Макрон үшін бұл мәселенің мәні зор.
Оңшыл радикалды «Ұлттық бірлестік» партиясының жетекшісі Марин Ле Пен сайлауда жеңіске жетсе, Еуроодақ деңгейінде ортақ келісімге келу әлдеқайда қиындайды деген қауіп бар. Ле Пен билікке келген жағдайда Францияның ЕО бюджетіне төлейтін жарнасын екі есе қысқартуға уәде берген.
EUobserver мәліметінше, Макрон ЕО елдерінің басшылары қатысқан жиында «қаңтардан бастап саяси келісімге қол жеткізу мүмкіндігі қалмайтынын» мәлімдеген.
«Кеңесте бірауыздан шешім қабылдануы қажет. Бірақ біз әзірге мұндай келісімнен өте алыспыз», – деп келтіреді басылым Германия канцлері Фридрих Мерцтің сөзін.
