Астана. 16 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев «Қазақстан Республикасының Үкіметі мен Ресей Федерациясының Үкіметі арасындағы 2010 жылғы 9 желтоқсандағы Қазақстан Республикасына мұнай және мұнай өнімдерін жеткізу саласындағы сауда-экономикалық ынтымақтастық туралы келісімнің қолданылуын қайта бастау және оған өзгерістер енгізу туралы хаттаманы ратификациялау туралы» заңға қол қойды.
Заң жұма күні Қазақстанның ресми бұқаралық ақпарат құралдарында жарияланды.
Хаттамаға 2024 жылғы 27 қарашада Астанада қол қойылған. Құжаттың басты мақсаты – 2024 жылғы 1 қаңтарда қолданылу мерзімі аяқталған келісімді қайта күшіне енгізу және екіжақты ынтымақтастықтың жекелеген ережелерін жаңарту.
Энергетика министрі Ерлан Ақкенженов Құрылтай отырысында мәлімдегендей, хаттама мұнай және мұнай өнімдерін жеткізудің жыл сайынғы индикативтік теңгерімдерін келісу, екі елдің уәкілетті органдары арасында ақпарат алмасу тәртібін сақтауға мүмкіндік береді. Сонымен қатар Ресейден мұнай өнімдерін баж салығынсыз импорттау мүмкіндігі де қарастырылған.
«Бұл келісім Қазақстанның энергетикалық қауіпсіздігін қамтамасыз ету және ішкі мұнай өнімдері нарығының тұрақты жұмыс істеуі үшін аса маңызды. Құжат екі мемлекеттің уәкілетті органдарының іс-қимылын үйлестіруге халықаралық құқықтық негіз қалыптастырады. Сондай-ақ мұнай өнімдерінің теңгерімін уақтылы әзірлеп, олардың жекелеген түрлері тапшылығының қаупі туындаған жағдайда қажетті шараларды дер кезінде қабылдауға мүмкіндік береді», – деп түсіндірген еді Ақкенженов.
Министрдің айтуынша, хаттама ратификацияланбаған жағдайда Қазақстан мен Ресей арасындағы мұнай және мұнай өнімдерін жеткізуді үкіметаралық деңгейде үйлестірудің халықаралық құқықтық тетігі өз күшін жояды. Соның салдарынан жеткізілімдердің тұрақтылығын алдын ала жоспарлау қиындап, ішкі нарықта мұнай өнімдері тапшылығы туындаған кезде жедел әрекет ету мүмкіндігі шектелуі ықтимал.
Құрылтайдың заңға қатысты қорытындысында атап өтілгендей, баж салығынсыз жеткізу тәртібін сақтау Қазақстанның ішкі нарығын мұнай өнімдерінің жекелеген түрлерімен қамтамасыз ету үшін маңызды.
Есептеулер бойынша, 2026 жылы осы жеңілдіктің арқасында шамамен 30 млрд теңге үнемделмек. Оның 5,59 млрд теңгесі бензинге, 15,75 млрд теңгесі дизель отынына, ал 8,61 млрд теңгесі авиациялық отынға тиесілі.
16 қазандағы ресми валюта бағамы – 1 АҚШ доллары үшін 454,14 теңге.
