Париж. 19 қазан. ИНТЕРФАКС – Франция премьер-министрі Себастьен Лекорню демалыс күндері болған тәртіпсіздіктерден кейін қауіпсіздікті қамтамасыз ету мақсатында дүйсенбі күні кешке елдің бірқатар ауданында коменданттық сағат енгізілетінін хабарлады.
«Мен префектілерге бүгін кешке коменданттық сағат енгізуді тапсырдым. Бұл шектеу барлық жерде бірдей қолданылмайды, тек белгілі бір аумақтарда ғана күшіне енеді», – деді ол дүйсенбі күні.
Бұған дейін «Республикашылдар» партиясынан президенттікке үміткер Брюно Ретайо елде төтенше жағдай жариялауға шақырған болатын. Лекорню қажет болған жағдайда мұндай шешім қабылданатынын, алайда әзірге коменданттық сағат енгізуді анағұрлым тиімді шара деп санайтынын айтты.
Үкімет басшысы тәртіпсіздіктер салдарынан зардап шеккен кәсіпкерлерге қолдау көрсету үшін қаржы бөлінетінін де мәлімдеді. Сауда министрлігінің мәліметінше, демалыс күндері кемінде 3 мың сауда орны тоналып, бүлінген.
Лекорнюдің пікірінше, «әсіре солшыл қозғалыс елде 2027 жылдың көктемінде өтетін президент сайлауына дейін жалғасатын бейберекеттік орнатуды көздейді». Премьер-министр тәртіпсіздіктер президент сайлауын өткізу кестесін бұзуға бағытталуы мүмкін деп есептейді.
17 қазанда Францияда бүкіл елді қамтыған наразылық шерулері өтті. Оларды ұйымдастыруда солшыл кәсіподақтар жетекші рөл атқарды. Наразылық акцияларына мектеп оқушылары мен студенттер ұйымдары, сондай-ақ «сары жилеттілер» қозғалысының өкілдері қатысты.
Шеруге шыққандардың басты талаптарының бірі күнкөріс құнының күрт қымбаттауынан туындаған дағдарыспен күресу болды. Атап айтқанда, олар жанармай мен күнделікті тұтынатын ең қажетті тауарлардың бағасын төмендетуді талап етті.
Алайда наразылық білдірушілер қатарына радикалды топтар қосылғаннан кейін бастапқыда бейбіт әрі бұқаралық сипатта өтуі тиіс шерулер жаппай қирату мен тонауға ұласты.
Франция қалаларына келтірілген шығын жүздеген миллион еуроға бағаланып отыр.
Жексенбі күні де тәртіпсіздіктер тоқтаған жоқ. Атап айтқанда, Парижде жексенбіден дүйсенбіге қараған түні кемінде 30 дүкен тоналды. Жексенбі күні Париж полициясы тәртіпсіздіктерге қатысқан 351 адамды ұстады.
