Бір апта бұрын біз Жамбыл облысында ресейлік рэпер Наваи Бакировтың есірткі заттарын заңсыз тасымалдауға және сақтауға қатысы бар деген күдікпен ұсталғанын хабарлаған едік. Алайда істің соңы біз күтпеген бағытта өрбіді.
«Келіп түскен сауалдарға байланысты хабарлаймыз: ресейлік рэп орындаушысына қатысты қылмыстық іс оның құқық бұзушылықты алғаш рет жасағаны және шын жүректен өкініп, кінәсін өтеуге бағытталған әрекеттері ескеріле отырып, қылмыстық-процестік заңнама талаптарына сәйкес ақтамайтын негіздер бойынша тоқтатылды». Бұл туралы Zakon.kz Жамбыл облыстық полиция департаментіне сілтеме жасап хабарлады.
Сондай-ақ қабылданған процестік шешімді прокуратура бекіткені және рэпердің Қазақстан аумағынан шығарылғаны хабарланды.
Істің осылай аяқталуы біршама тосын көрінеді. Оның үстіне, бұған дейін Ресейдің Қазақстандағы Бас консулдығы дипломатиялық нота жолдаған болатын.
«Біз Ресей азаматына қатысты жағдайға ресми түсініктеме беруін сұрап, Қазақстан Республикасы Сыртқы істер министрлігінің Алматыдағы өкілдігіне дипломатиялық нота жолдадық», – деп РБК Ресей консулдығы баспасөз қызметінің өкіліне сілтеме жасап жазды.
Бұған дейін Наваи Бакировтың Қазақстандағы адвокаты Рена Керимова да журналистерге берген түсініктемесінде рэпердің бас бостандығынан айырылуы екіталай екенін айтқан.
«Жазаға келсек, оған бас бостандығынан айыру жазасы тағайындалмайды деп ойлаймын. Өйткені бұл – ауырлығы орташа қылмыс. Іс айыппұл салумен аяқталуы мүмкін. Бәрі жақсы шешіледі деп сенемін», – деген еді Керимова.
Алайда рэпер үшін жағдай адвокаты болжағаннан да сәтті аяқталды. Оған қатысты қылмыстық іс мүлде тоқтатылды.
Біздің болжамымызша, мұндай шешімнің қабылдануына ресейлік дипломаттардың араласуы әсер еткен болуы мүмкін. Өйткені Ресейдің Бас консулдығы мұндай оқиғалардың әрқайсысына байланысты дипломатиялық нота жолдай бермейді.
Оның үстіне, полиция қылмыстық істің ақтамайтын негіздер бойынша тоқтатылғанын ашық мәлімдеді. Бұл құқық қорғау органдары рэпердің әрекетінен қылмыс белгілерін анықтағанымен, қылмыстық қудалауды тоқтату туралы шешім қабылдағанын білдіреді.
Жаңалықтың астына пікір қалдырған желі қолданушылары да таңданысын жасыра алмай, «Сонда осылай да жасауға бола ма?» деген сауал қойып жатыр.
