Лондон. 25 қазан. ИНТЕРФАКС – АҚШ Әуе күштерінің B-52H Stratofortress стратегиялық бомбалаушы ұшағы елдің құрлықтық бөлігінен Норвегия теңізі маңына дейін оқу-жаттығу ұшуын орындады. Бұл туралы Ұлыбританияның әуе қозғалысын бақылайтын Military Air Tracking Alliance (MATA) ресурсы хабарлады.
Ұшу АҚШ Қарулы күштерінің Стратегиялық қолбасшылығы (USSTRATCOM) өткізіп жатқан Global Thunder атты жыл сайынғы стратегиялық ядролық күштер жаттығуы аясында жүзеге асырылды.
Қолда бар мәліметтерге сәйкес, оқу-жаттығуға екі B-52H стратегиялық бомбалаушы ұшағы қатысуға тиіс болған. Алайда олардың бірі Солтүстік Дакота штатындағы Майнот әскери әуе базасынан көтерілгеннен кейін көп ұзамай белгісіз себеппен кері қайтқан.
Ал «HUSH11» шақыру белгісімен ұшқан екінші ұшақ сапарын жалғыз жалғастырды. Канаданың солтүстік-шығысы мен Исландияның оңтүстігіндегі әуе кеңістігінде оған америкалық жанармай құюшы ұшақтар әуеде жанармай құйды.
АҚШ Қарулы күштерінің Стратегиялық қолбасшылығы бұған дейін Global Thunder 27 жаттығуына стратегиялық күштердің барлық құрылымдарының әскери қызметшілері қатысатынын хабарлаған.
«Global Thunder 27 жаттығуына стратегиялық күштердің барлық құрылымдарының жеке құрамы жұмылдырылды. Жаттығудың мақсаты – ядролық күштердің жауынгерлік әзірлігін арттыру, сондай-ақ стратегиялық тежеу әлеуетінің қауіпсіздігін, сенімділігін, тиімділігін және қарсыласқа ықпал ету қабілетін қамтамасыз ету», – делінген қолбасшылық хабарламасында.
Сонымен қатар АҚШ тарапы бұл жаттығудың жыл сайын жоспарлы түрде өткізілетінін және қандай да бір мемлекеттің, өзге тараптардың әрекеттеріне немесе әлемде болып жатқан оқиғаларға жауап ретінде ұйымдастырылмағанын атап өтті.
АҚШ Қарулы күштерінің Стратегиялық қолбасшылығына ядролық қару алып жүруге қабілетті стратегиялық бомбалаушы ұшақтардың бөлімдері мен құрамалары бағынады. Олардың қатарында 46 B-52H және 19 B-2 ұшағы бар.
Бұдан бөлек, қолбасшылық қарамағында шахталарда орналастырылған 400 Minuteman III құрлықаралық баллистикалық зымыраны және Ohio үлгісіндегі 14 стратегиялық атом сүңгуір қайығы бар. Әрбір сүңгуір қайық 20 Trident II D5 баллистикалық зымыранымен жабдықталған.
