Гонконг. 9 қараша. ИНТЕРФАКС – Азия-Тынық мұхиты аймағындағы қор нарықтары сауда күнін әрқилы нәтижемен аяқтады.
Қытайдың Shanghai Composite индексі 0,3%-ға көтерілсе, Гонконгтің Hang Seng индексі 0,1%-ға төмендеді.
Гонконгте ең көп құлдыраған Meituan интернет-компаниясының (SPB: 3690) нарықтық құны 6,5%-ға азайды. Бұған Morgan Stanley сарапшыларының компания акциялары бойынша ұсынымын «нарықтан жоғары» деңгейінен «нарықпен бірдей» деңгейіне түсіруі себеп болды.
Longfor Group акциялары 3,8%-ға, Orient Overseas – 3,7%-ға, BYD Electronic – 3,2%-ға, Xinyi Solar – 2,8%-ға, Contemporary Amperex Technology – 2,7%-ға арзандады.
Ал сыра өндіруші Budweiser Brewing Co. акциялары 3,1%-ға, биотехнологиялық Wuxi Biologics – 2,7%-ға қымбаттады. Энергетикалық China Shenhua Energy мен жартылай өткізгіш өндіруші Hua Hong Grace Semiconductor акцияларының әрқайсысы 2,4%-ға, фармацевтикалық WuXi AppTec акциялары 2,3%-ға өсті.
Дүйсенбіде жарияланған ресми деректерге сәйкес, қазан айында Қытайда тұтыну бағаларының өсуі баяулап, өндірушілер бағасының өсімі жеделдеген. Өткен айда тұтыну бағаларының индексі (CPI) жылдық есеппен 0,7%-ға өсті. Бұл – маусымнан бергі ең төмен көрсеткіш. Қыркүйекте өсім 0,9% болған еді. Өндірушілер бағасының индексі (PPI) қыркүйектегі 5%-дан қазанда 5,7%-ға дейін көтеріліп, 2022 жылғы маусымнан бергі ең жоғары деңгейге жетті.
Жапонияның Nikkei 225 индексі 2,3%-ға өсті.
Консалтингтік BayCurrent компаниясының акциялары 8,8%-ға, құрылыс саласындағы Shimizu – 7,7%-ға, электрондық жабдық жеткізуші Mitsubishi Electric – 7,3%-ға қымбаттады. Тақырыптық саябақтар мен қонақүйлерді басқаратын Oriental Land және бағдарламалық жасақтаманы тестілеумен айналысатын Shift Inc. акцияларының әрқайсысы 6,9%-ға көтерілді.
Mitsui Chemicals химия компаниясының нарықтық құны 8,5%-ға төмендеді. Бұған компанияның жартылай өткізгіш өндірісіне арналған материалдар шығаратын JSR компаниясын 1,84 трлн иенге (11,6 млрд доллар) сатып алатыны туралы хабар себеп болды.
Жылжымайтын мүлік саласындағы Tokyu Fudosan компаниясының нарықтық құны 4,5%-ға, инвестициялық-технологиялық SoftBank Group – 4,2%-ға, электрондық жабдық жеткізуші Kokusai Electric – 3,6%-ға, электроника және керамика өнімдерін өндіретін Ibiden – 3,5%-ға азайды. Mitsubishi мен Mazda автокөлік компанияларының нарықтық құны тиісінше 2,7% және 2,5% төмендеді.
Оңтүстік Кореяның Kospi индексі 0,8%-ға төмендеді.
Әлемдегі ірі чип пен смартфон өндірушілердің бірі Samsung Electronics акциялары 0,6%-ға, чип өндіруші SK Hynix акциялары 0,4%-ға қымбаттады.
Аккумулятор өндіруші LG Energy Solution акциялары 5,8%-ға, автокөлік шығаратын Hyundai – 2,9%-ға, түсті металл жеткізуші Korea Zinc – 2,6%-ға, болат өндіруші Posco – 2,3%-ға арзандады.
Аустралияның S&P/ASX 200 индексі 0,1%-ға өсті.
Өсім қарқыны бойынша алғашқы үш орынға изотоптарды лазермен бөлу технологиясын әзірлейтін Silex Systems (+12,2%), уран жеткізуші Paladin Energy (+10,9%) және Deep Yellow (+10,6%) компаниялары шықты.
Ең көп құлдыраған инфрақұрылым нысандарын басқарумен айналысатын Ventia Services Group акциялары 16,2%-ға арзандады. Компания дүйсенбіде екінші жартыжылдықта түсімінің азаюын күтіп отырғанын хабарлады.
Жарылғыш заттар өндіруші Dyno Nobel компаниясының нарықтық құны 2026 қаржы жылының көңіл көншітпеген есебі жарияланғаннан кейін 11%-ға төмендеді.
Әлемдегі ірі тау-кен компаниялары BHP мен Rio Tinto-ның нарықтық құны тиісінше 2,7% және 1,6% өсті.
