Берлин. 24 қазан. ИНТЕРФАКС.
Германияның сыртқы істер министрі Йоханн Вадефуль 27–28 қазанға жоспарланған Қытай сапарын белгісіз мерзімге кейінге қалдырды. Бұл шешімге, Берлиннің хабарлауынша, Қытай тарапы жоспарланған бірқатар кездесулерді растамағаны себеп болған. Бұл туралы жұма күні немістің ARD телеарнасы хабарлады.
Телеарнаның мәліметінше, Қытай жағы министрдің ҚХР сыртқы істер министрі Ван Имен кездесуін ғана растаған, ал өзге жоспарланған кездесулердің өткізілуі жөнінде нақты жауап бермеген.
Алайда Германия СІМ кездесудің толықтай тоқтатылмағанын, тек белгісіз мерзімге кейінге қалдырылғанын атап өтті.
«Қазір Қытай тарапымен талқылайтын өзекті мәселелер өте көп. Бірлескен жоспарға қарамастан, алдағы күндері жеке кездесу өткізу мүмкін болмай отырғанына өкініш білдіреміз», – деп келтіреді ARD Германия СІМ өкілі Катрин Дешауэрдің сөзін.
Оның айтуынша, кездесуді кейінге қалдырмау маңызды, себебі неміс компаниялары Қытайдың сауда шектеулеріне, әсіресе сирек кездесетін металдар мен жартылай өткізгіштер саласындағы шектеулерге байланысты алаңдаушылық білдіріп отыр.
Сапардың жаңа мерзімі кейін хабарланатын болады. Вадефуль мен Ван И жақын уақытта телефон арқылы кең ауқымды пікір алмасу өткізуді жоспарлап отыр.
