Мәскеу, 31 қазан. ИНТЕРФАКС. Апта соңында мұнай нарығындағы баға көрсеткіштері құлдырап, қазан айын да теріс аймақта аяқтауға жақын.
Лондондағы ICE Futures биржасында Brent маркалы мұнайдың желтоқсан айына арналған фьючерстері бүгін таңертеңгі саудада барреліне $64,62 деңгейінде тіркелді. Бұл – алдыңғы күнгі жабылудан $0,38 немесе 0,58% төмен көрсеткіш. Бұған дейін бейсенбі күні бұл келісімшарттар $0,08-ге (0,12%) қымбаттап, $65 межесіне жеткен болатын.
WTI маркалы мұнайдың желтоқсан айындағы фьючерстері Нью-Йорктағы NYMEX электронды алаңында $60,15 болып, $0,42 немесе 0,69%-ға арзандады. Алдыңғы сессияда олардың құны $0,09-ға (0,15%) көтеріліп, $60,57 болған еді.
Апта ішінде Brent пен WTI маркалары 2%-дан астам, ал ай басынан бері шамамен 3%-ға арзандаған.
Бағаның төмендеуіне нарықта ұсыныс артады деген болжамдар әсер етуде. Сауда қатысушылары ОПЕК+ ұйымының 2 қарашада өтетін кезекті кездесуін күтуде. БАҚ мәліметтеріне қарағанда, желтоқсанда өндіру көлемін тағы біртіндеп арттыру жоспары қаралуда. Негізгі нұсқа ретінде тәулігіне 137 мың баррельге қосымша квота бекіту ұсынылуы мүмкін.
Сонымен қатар, Қытайдан бүгін жарияланған деректер елдің өңдеу өнеркәсібіндегі іскерлік белсенділіктің бәсеңдегенін көрсетті, бұл жаһандық мұнайға деген сұранысқа қатысты оптимизмді әлсіретіп отыр. Қазан айында Қытайдың өнеркәсіптегі сатып алулар менеджерлері индексі (PMI) 49 пунктке дейін төмендеді (қыркүйекте — 49,8). Бұл сәуірден бергі ең төменгі көрсеткіш және 50 межесінен төмен түсу — саланың әлсірегенін білдіреді.
Бұған қоса, нарықта АҚШ-тың ресейлік ірі мұнай компаниялары — «ЛУКОЙЛ» мен «Роснефтьке» қатысты енгізген санкцияларының ықпалы да бағаланып жатыр.
TotalEnergies француз энергетикалық алпауытының басшысы Патрик Пуянне бейсенбі күні инвесторларға арналған телеконференцияда сөйлеген сөзінде:
«АҚШ-тың соңғы санкциялары мұнай нарығына шынайы әсер етіп отыр. Қазірдің өзінде біз нақты ықпалын байқай бастадық. Бірақ нарық бұл фактордың маңызын әлі толық ескеріп отырған жоқ», – деп мәлімдеді.
