Брюссель. 6 қараша. ИНТЕРФАКС – Бельгияның Ұлттық қауіпсіздік кеңесі бейсенбі күні әуе кеңістігін дрондар арқылы заңсыз бұзу мәселесіне арналған отырыс өткізіп, 2026 жылы 1 қаңтарға дейін Ұлттық әуе қауіпсіздігі орталығын іске қосу туралы шешім қабылдады.
RTBF телеарнасының хабарлауынша, теңіз күштері құрамында осыған ұқсас қауіпсіздік орталығы болғанымен, оның міндеттеріне әуе кеңістігін бақылау кірмеген.
«Негізгі идея – барлық қызметтердің бір орталыққа бірігіп, болып жатқан жағдай туралы толық әрі нақты ақпарат алуы. Біз бұл тәсілді әуе кеңістігіне де қолданатын боламыз. Орталық заңды түрде құрылған, енді оны іске қосу ғана қалды. Ол 1 қаңтардан бастап толыққанды жұмысын бастайды», – деді отырыстан кейін Бельгияның қорғаныс министрі Тео Франкен.
Ұлттық қауіпсіздік кеңесіне қорғаныс, ішкі істер, әділет және сыртқы істер министрлері кіреді. Кеңестің шұғыл отырысы соңғы күндері Бельгияның бірқатар әуежайлары мен әскери базалары маңында белгісіз дрондардың байқалуына байланысты өткізілді. Бұл оқиғалар елдегі әуе қатынасының бұзылуына, бірқатар рейстердің кейінге шегерілуі мен тоқтатылуына себеп болды.
RTBF телеарнасының хабарлауынша, кеңес қорытындысы бойынша министрлер үш негізгі бағытта жұмыс жүргізу туралы шешім қабылдаған: дрондарды анықтау, оларды сәйкестендіру және тыйым салынған аймақтарға ұшу жағдайында қарсы әрекет ету механизмдерін енгізу.
«Бүгін біз ортақ әрі нақты міндеттеме алдық: әрбір құзырлы орган ұлттық қауіпсіздігімізге қатер төндіруі мүмкін дрондарға қарсы күресті күшейтуге бағытталған шараларды қабылдайды. Қазіргі күрделі халықаралық жағдай аясында біз қажетті шешімдер қабылдауға және салмақты әрекет етуге дайынбыз», – деді Бельгияның ішкі істер министрі Бернар Кентэн.
