АСТАНА. 11 қараша. ИНТЕРФАКС-ҚАЗАҚСТАН – Қазақстанда Ұлттық геологиялық қызмет базасында сертификатталған зертханалық кешен салынады. Бұл туралы Үкімет отырысында ҚР Индустрия және құрылыс вице-министрі Иран Шархан мәлім етті.
«Геологиялық талдаудың сапасын арттыру мақсатында Ұлттық геологиялық қызмет базасында заманауи сертификатталған зертханалық кешен құрылатын болады. Бұл нысан еліміздің ғылыми-технологиялық әлеуетінің орталығына айналады. (…) Кешенді пайдалануға беру 2028 жылдың желтоқсан айына жоспарланып отыр», – деді Шархан.
Оның айтуынша, жаңа кешенде геоаналитикалық зертханалар, геологиялық материалдардың қоры сақталатын қоймалар мен керн сақтау орындары орналасады. Бұл геологиялық ақпаратты сақтау және өңдеудің бірыңғай инфрақұрылымын құруға мүмкіндік береді.
Жоба үшін Астанадан 4 гектар жер телімі бөлінген. Кешеннің құрылысына жұмсалатын жалпы қаражат көлемі 14 млрд теңгені құрайды.
