АСТАНА. 11 қараша. ИНТЕРФАКС-ҚАЗАҚСТАН – 2026–2028 жылдар аралығында Қазақстанда 100 мың шаршы шақырым аумақта геологиялық барлау жұмыстары жүргізіледі, ал кейінгі жылдары жыл сайын шамамен 30 мың шаршы шақырым зерттеледі. Бұл туралы ҚР Индустрия және құрылыс вице-министрі Иран Шархан Үкімет отырысында мәлімдеді.
«Еліміздегі геологиялық-геофизикалық зерттелу аумағын 2026 жылы 2,2 млн шаршы шақырымға дейін жеткізу жұмыстары жүргізілуде. Қазіргі таңда 2 млн 14 мың шаршы шақырым зерттелген. Жыл соңына дейін бұл көрсеткіш 2 млн 38 мың шаршы шақырымға жетеді. Ал 2026–2028 жылдары қосымша 100 мың шаршы шақырым зерттеледі. Кейін жыл сайын 30 мың шаршы шақырымды қамту жоспарланып отыр», – деді вице-министр.
Оның айтуынша, келесі кезеңде зерттеу жұмыстарының ауқымы 1:50 000 масштабқа дейін ұлғайтылады. Бұл болашағы бар учаскелерді жедел анықтауға және геологиялық барлау тиімділігін арттыруға мүмкіндік береді.
Зерттеу жұмыстарын жеделдету мақсатында жаңа геологиялық түсіру стандарттары бекітіліп, Үкімет резервінен 240 млн теңге бөлінді. Бұл қаражат 20 жобалық-сметалық құжаттаманы әзірлеуге бағытталған. Жобаларды жүзеге асыруға Ұлттық геологиялық қызмет, «Центргеосъемка», Сәтбаев атындағы Геология институты және саланың жетекші мамандарынан құралған консорциум қатысуда.
Барлау барысында аэрогеофизикалық, геохимиялық және цифрлық технологиялар қолданылатын болады. Бұл жұмыстарға «Тау-Кен Самұрық» компаниясы да қатысады.
«Алдағы жылға алдын ала 44,4 млрд теңге көлемінде қаржыландыру қарастырылды. Бұл қаражат кешенді геолого-геофизикалық зерттеулер, сейсмобарлау және салалық инфрақұрылымды дамытуға бағытталады», – деді Шархан.
Оның мәліметінше, геологиялық барлау жұмыстарының нәтижесінде алғаш рет бес кен орны мемлекеттік есепке алынды. Олар – Көк-Жон (Болаттөбе учаскесі), Алтын-Шоқы, Самомбет, Студенттік және Тақыр-Қалжыр.
«Жаңа қорлардың өсімі шамамен 98 тонна алтынды, 36 мың тонна мысты, 11 млн тонна марганецті және 1,3 млн тоннадан астам фосфоритті құрады», – деп толықтырды вице-министр.
11 қарашадағы ресми валюта бағамы: 1 АҚШ доллары – 523,58 теңге.
