Брюссель. 18 қараша. ИНТЕРФАКС – Еуропалық комиссия (ЕК) президенті Урсула фон дер Ляйеннің 17 қараша күні Еуроодақ елдерінің басшыларына жолдаған хатында баяндалған, 2026–2027 жылдары Украинаға қаржылай көмек көрсетуге қатысты ұсыныстар ЕО-ға мүше мемлекеттермен талқыланады. Бұл туралы ЕК ресми өкілі Паула Пинью Брюссельде өткен брифингте мәлімдеді.
«Еуропалық кеңестің (18–19 желтоқсан – ИФ) қарсаңында талқылаулар жалғасады және бұл мәселе оның күн тәртібіне енгізіледі», – деді ол.
Пиньюдің айтуынша, бұл хат – қазан айындағы Еуропалық кеңестің шешімімен Еурокомиссияға берілген Украинаға көмек көрсету нұсқаларын әзірлеу тапсырмасына жауап ретінде дайындалған.
Ресми өкіл ұсынылған үш нұсқаның мазмұнын нақтыламады. Себебі хат ЕО мемлекет басшыларына арналып жолданған және оның мазмұнына қатысты пікір айтуға әлі ерте екенін айтты. «Диалог жалғасады. Комиссия төрағасы өз ұсынысы аясында Еуропалық кеңеске дейін жұмысын жалғастыра береді», – деп атап өтті Пинью.
Оның айтуынша, бұл қаржы тетіктері бойынша заңнамалық бастама ұсынуға әлі ерте. Қазіргі кезең – әрбір мүше мемлекетпен қарқынды келіссөздер жүргізу арқылы желтоқсан айында пысықталған ұсынысты ұсынуға дайындық сатысы.
«Біз бұл мәселенің өзектілігін жақсы түсінеміз. Уақыт аз. Украина үшін қажетті қаржылық қолдауды қамтамасыз ету мақсатында ЕО Кеңесінің келісімі аса маңызды. Қазір бұл процестің алғашқы кезеңі ғана. Құжат ұсынылды және енді біз консультациялар жүргізіп жатырмыз. Еуропалық кеңестің ЕК-ге жолдаған сұрақтарына осы құжат жауап береді деп үміттенеміз», – деді ЕК өкілі.
ЕК-нің тағы бір өкілі Балаж Уйвари хаттың бірнеше ай бойы жүргізілген жұмыс нәтижесінде дайындалғанын атап өтті.
Оның айтуынша, ұсыныс дайындау барысында мынадай қағидаттар басшылыққа алынған: Украинаға көмек жедел көрсетілуі тиіс; украин борышының тұрақтылығы қамтамасыз етілуі қажет; қазіргі күрделі жағдайда қаржыландыру жеткілікті икемді болуы тиіс және қаржылық жүктеме халықаралық серіктестер арасында әділ бөлінуі тиіс.
Бұған дейін Bloomberg агенттігі хабарлағандай, фон дер Ляйеннің хатында Украинаға қаржылай қолдау көрсетудің үш нұсқасы ұсынылған:
1.2026–2027 жылдары ЕО елдері тарапынан кемінде 90 млрд еуро көлемінде гранттар бөлу;
2.ЕО-ның ортақ қарызы негізінде несие беру;
3.Ресейдің мұздатылған активтерін кепіл ретінде пайдалану арқылы қаржыландыруды қамтамасыз ету.
