Вашингтон. 21 қараша. ИНТЕРФАКС – The Wall Street Journal (WSJ) басылымының хабарлауынша, Еуропалық Одақ елдерінің көшбасшылары Украинадағы қақтығысты реттеуге арналған АҚШ жоспарына жауап ретінде өз ұсыныстарын дайындап жатыр.
Басылым мәліметінше, ЕО “бейбіт реттеу жөніндегі балама ұсыныс дайындауда” және бұл құжаттың Киевке неғұрлым қолайлы болуын көздеп отыр. Алайда Украина әзірге бұл бастамаға қосылу жөнінде нақты уәде берген жоқ.
WSJ деректеріне сүйенсек, Киев АҚШ ұсынған жоспардағы 28 тармақтың бірін елеулі түрде өзгерткен. АҚШ-тың жоғары лауазымды өкіліне сілтеме жасаған басылым, бастапқыда жоспарда шетелдік көмекті толықтай аудиттен өткізу көзделгенін, алайда бұл тармақ “қақтығыс кезіндегі барлық әрекеттерге толық амнистия жариялау” етіп өзгертілгенін жазады.
Бұған дейін бірқатар Батыс басылымдары АҚШ жоспары төрт негізгі бөлімнен тұратын 28 тармақтан құралатынын хабарлаған болатын: Украинадағы бейбітшілік, қауіпсіздік кепілдіктері, Еуропадағы қауіпсіздік және АҚШ-тың Украинамен және Ресеймен болашақтағы қарым-қатынастары.
Financial Times басылымының хабарлауынша, жоспарға украин армиясының санын екі есе қысқарту, Киевтің кейбір қарудан бас тартуы және Донбастан бас тартуы кіреді. Сондай-ақ АҚШ-тың әскери көмегі қысқартылып, Украинада орыс тіліне ресми мәртебе беру және Украин православ шіркеуін ресми тану ұсынылған.
Осы аралықта Ресей президентінің баспасөз хатшысы Дмитрий Песков бейсенбі күні журналистердің Украина бойынша реттеу жоспарының бар-жоғы туралы сауалына жауап беріп: “Бұл мәселеге қатысты біз бұған дейін бірнеше рет айтқанымызды қайталай аламыз. Анкоридждегі мәлімдемеден бөлек айтар жаңалығымыз жоқ. Қосымша жаңашылдықтар жоқ”, – деді.
