Астана. 26 қараша. ИНТЕРФАКС-ҚАЗАҚСТАН – Қазақстанның «Бәйтерек» ұлттық басқарушы холдингі ұлттық инвестициялық холдинг мәртебесіне ие болды. Бұл туралы Үкіметтің баспасөз қызметі мәлімдеді.
«Директорлар кеңесі «Бәйтерек» АҚ-ны «Ұлттық инвестициялық холдинг» ретінде қайта құруды мақұлдады», – делінген сәрсенбі күні таратылған хабарламада.
Пресс-релизге сәйкес, жаңа мәртебеге сай холдингке инфрақұрылымдық, экспорттық және индустриялық жобаларды қолдауға бағытталған қосымша функциялар жүктеледі.
«Негізгі мақсаттар – капитал тарту белсенділігін арттыру, ішкі өндірісті дамыту және импортты алмастыру. Сондай-ақ, шикізаттық емес экспорттың үлесін ұлғайту мен бәсекеге қабілетті бизнесті қалыптастыруға ерекше мән беріліп отыр», – делінген құжатта.
Үкіметтің пікірінше, бұл қадам жоғары өнімді кәсіпорындар ашуға және жаңа жұмыс орындарын құруға ықпал етіп, ел экономикасының сапалы дамуына және халық табысының өсуіне мүмкіндік береді.
Премьер-министр Олжас Бектеновтың төрағалығымен өткен директорлар кеңесінің отырысында айтылғандай, құрылымдық және мазмұндық трансформация нәтижесінде холдинг шетелден капиталмен, тәжірибемен және технологиялармен келетін ірі инвесторларды тартудың тиімді құралына айналуы тиіс. Бұл ретте инвестициялар ел үшін басым бағыттарға бағытталатын болады.
Сонымен қатар, Президенттің цифрландыру жөніндегі тапсырмаларын іске асыру аясында холдинг басқармасының жасанды интеллект құралдарын кәсіпкерлікті қолдау саласында енгізу бойынша тиімділік көрсеткіштері белгіленді.
Холдинг төрағасының орынбасарлары үшін де тиімділік көрсеткіштері қайта қаралып, олардың басқаратын бағыттары бойынша шетелдік инвестиция тарту көлеміне назар аударылмақ. Жалпы алғанда, жоспарлы көрсеткіштер мен мақсаттар оң серпінге қол жеткізу үшін қайта пысықталады.
Үкімет, Ұлттық банк және Қаржы нарығын реттеу және дамыту агенттігінің 2026–2028 жылдарға арналған бірлескен іс-қимыл бағдарламасы шеңберінде «Бәйтерек» холдингі нақты секторды несиелеу көлемін арттыруда. Қазіргі таңда бизнеске 5,7 трлн теңге көлемінде қолдау көрсетілген, нәтижесінде 29 мыңға жуық жаңа жұмыс орны құрылған. Биыл бизнеске көрсетілетін мемлекеттік қолдау көлемі 8 трлн теңгеге дейін жеткізілмек.
Бұған дейін мемлекет «Бәйтерек» холдингін алдағы төрт жылда жыл сайын 1 трлн теңгеге қосымша капиталдандыратыны, ал холдинг жыл сайын 8 трлн теңгеге дейін сыртқы қарыз тартатыны хабарланған болатын. Бұл қаражат басым жобаларды қаржыландыруға бағытталады.
«Бәйтерек» холдингі – кәсіпкерлікті қолдауға, агроөнеркәсіптік кешенді дамытуға және халықты тұрғын үймен қамтамасыз етуге бағытталған интеграцияланған даму институты. Холдингтің түпкілікті бенефициары – Қазақстан Үкіметі.
