Қазақстан Республикасы Президентінің жанындағы Орталық коммуникациялар қызметі хабарлайды: Мал шаруашылығын дамыту жөніндегі кешенді жоспарды әзірлеу мақсатында жұмыс тобы құрылды. Оның құрамына ғылыми ұйымдар, салалық қауымдастықтар, «Атамекен» ҰКП, республикалық палаталар, бизнес өкілдері, жергілікті атқарушы органдар және Парламент депутаттары кірді. Бұл туралы өткен баспасөз конференциясында ҚР Ауыл шаруашылығы вице-министрі Аманғали Бердалин мәлімдеді. Оның айтуынша, жоспар аясында бірқатар шараларды іске асыру көзделіп отыр: Біріншіден, мал шаруашылығының барлық бағыттары бойынша айналым қаражатын толықтыру үшін 5% мөлшерлемемен жеңілдетілген несиелеу бағдарламасы іске қосылады. Екіншіден, барлық түрдегі асыл тұқымды мал сатып алуға 6% мөлшерлемемен ұзақ мерзімді жеңілдетілген несие беру бағдарламасы жүзеге асырылады. Үшіншіден, пайдаланылмай жатқан жайылымдық жерлердің әлеуетін тиімді пайдалану үшін, соның ішінде Қостанай облысының Торғай өңірі мен Ұлытау облысында, жайылымдық мал шаруашылығын дамытуға бағытталған 6% мөлшерлемемен бірыңғай несиелік өнім іске қосылады. Бұл құрал жайылым инфрақұрылымын дамытуға қаржы тартуға мүмкіндік береді. Төртіншіден, жасанды ұрықтандырудың заманауи технологиясы енгізіледі. Бесіншіден, жүн мен теріні өткізуге арналған сервистік дайындау орталықтарының жұмыс істеуіне жағдай жасалады. Бұл мақсатта жылдық 5% мөлшерлемемен айналым қаражатын несиелеу көзделіп отыр.
Евразия24 пікірі:
Ауыл шаруашылығы саласын дамытуға қатысты мемлекеттік саясаттың негізгі бағыты – мал шаруашылығын түрлі мақсаттарға арналған жеңілдетілген несиелеу арқылы қолдау болатыны аталған жаңалықтан айқын аңғарылады. Бұл ретте, жылдық 5–6% мөлшерлемемен берілетін несиелер бойынша базалық мөлшерлеме (қазіргі таңда 18%) мен жеңілдетілген мөлшерлеме арасындағы айырмашылықты мемлекет бюджет есебінен өтейтінін түсінеміз. Мұндай тетіктер тіпті квазимемлекеттік қаржы институттары арқылы жүзеге асқан жағдайда да бюджеттік шығындарды қажет ететіні белгілі. Осыған байланысты бірқатар сауалдар туындайды: бұл бастама салық төлеушілерге қаншаға түседі және оның нақты тиімділігі қандай болмақ? Бұған қоса, өткен кезеңдердегі ауыл шаруашылығына қатысты жағымсыз тәжірибелердің қайталану қаупі жоқ па? Мәселен, мал басын немесе өнім көлемін негізсіз арттырып көрсету, нақты іске аспаған жобалар, тіпті тіркеуде болғанымен жасы жүзге жеткен сиырлар жайлы деректер кезінде қоғамда сынға іліккені есімізде. Айта кету керек, ауыл шаруашылығын жеңілдетілген несиелеу туралы ой бұрыннан белгілі. Мәселен, 2001 жылы шаруаларды қолдау мақсатында «Аграрлық несие корпорациясы» құрылып, дәл осы 5–6% мөлшерлемемен берілетін түрлі несиелік бағдарламалар іске қосылған болатын.
