Астана. 19 желтоқсан. Интерфакс-Қазақстан — Қазақстан Президенті Қасым-Жомарт Тоқаев жаһандық қауіпсіздік архитектурасы ядролық тежеуге негізделмеуі тиіс екеніне сенімді екенін білдіріп, ядролық қаруды қолдану және сынау қаупін жоюға бағытталған көпжақты әрі батыл қадамдарға әлемдік қауымдастықты шақырды.
«Хиросима, Нагасаки және Семей адамзат үшін ядролық жауапкершілік пен ұстамдылықтың қаншалықты қымбатқа түсетінін еске салады. Тәуелсіздік алғаннан кейін Қазақстан Семей ядролық сынақ полигонын жабу және әлемдегі көлемі жағынан төртінші ядролық арсеналдан бас тарту жөнінде тарихи шешім қабылдады. Бұл әлсіздіктің көрінісі емес, керісінше стратегиялық көрегендіктің және бейбітшілік пен адамзат қауіпсіздігіне берік ұстанымның айғағы болды», — деді Тоқаев Токиодағы БҰҰ Университетінде оқыған дәрісінде.
Президенттің сөзінен үзінділерді жұма күні оның баспасөз қызметі таратты.
«Отыз жыл өткен соң да біздің ұстанымымыз өзгерген жоқ: жаһандық қауіпсіздік архитектурасы ядролық тежеуге сүйенбеуі тиіс», — деп атап өтті Мемлекет басшысы.
Ол халықаралық қауымдастықты толық ядролық қарусыздануға бағытталған күш-жігерді жандандыруға және Ядролық сынақтарға жаппай тыйым салу туралы шарттың күшіне енуін қамтамасыз етуге шақырды.
«Қазақстан ядролық державалар арасында жоғары деңгейдегі диалогты қайта жандандыруды және ядролық қаруды қолдану мен сынау қаупін жоюға бағытталған неғұрлым шешімді көпжақты іс-қимылдарды қолдайды. Бұл жаһандық үдерістерде Қазақстан мен Жапонияның ерекше моральдық беделі бар. Біздің елдер ядролық державалар ортақ келісімге келуде қиындыққа тап болған жағдайда, келіспеушіліктерді жұмсартып, прагматикалық көшбасшылық таныта алады», — деді Қасым-Жомарт Тоқаев.
