Еуразиялық экономикалық комиссия хабарлайды: «Еуразиялық экономикалық комиссия Кеңесі бөлшек саудада сатуға арналған көкөністердің жекелеген түрлеріне қатысты әкелу кедендік алымынан босату түріндегі тарифтік жеңілдік беру туралы шешім қабылдады. Атап айтқанда, Қазақстанға 100 мың тоннадан, Қырғызстанға 50 мың тоннадан аспайтын көлемде картоп жеткізу; Арменияға 5 мың тонна, Қазақстанға 100 мың тонна көлемінде пияз жеткізу; Беларусь еліне 600 тонна, Қырғызстанға 500 тонна көлемінде түсті қырыққабат пен брокколи жеткізу; Қазақстанға 35 мың тоннадан аспайтын ақ бас қырыққабат және 30 мың тоннадан аспайтын сәбіз жеткізу; Қырғызстанға 400 тоннаға дейін қияр жеткізу; Беларусь пен Қырғызстанға 200 тоннадан, Ресейге 6,6 мың тоннаға дейін баклажан жеткізу; сондай-ақ Беларусь еліне 5,2 мың тонна, Қырғызстанға 2 мың тонна және Ресейге 27 мың тоннадан аспайтын көлемде тәтті бұрыш жеткізу туралы сөз болып отыр. Бұл жеңілдіктің қолданылу мерзімі — 2026 жылғы 30 маусымға дейін. Сондай-ақ, 2026 жылғы 31 мамырға дейін Қырғызстанға 5 мың тоннаға дейін қызанақ әкелуге тарифтік жеңілдік берілді. «Әдетте, маусымаралық кезеңде көкөніс нарығында тұтыну бағасының едәуір құбылуы байқалады. Бұл, ең алдымен, отандық өнім қорларының таусылуына байланысты. Қабылданған шара ішкі нарықты қосымша өніммен қамтамасыз етуге және халық үшін көкөніс бағасының қолжетімділігін арттыруға мүмкіндік береді», – деп атап өтті ЕЭК Сауда жөніндегі министрі Андрей Слепнев. Шешім ресми жарияланған күннен бастап 10 күнтізбелік күн өткен соң күшіне енеді.
Еуразия24 пікірі:
ЕАЭО аясында қабылданған бұл шешім шұғыл шара емес, керісінше, әбден қалыптасқан тетік арқылы жүзеге асырылатын жыл сайынғы тәжірибе. Ішкі азық-түлік нарығының жай-күйіне байланысты, әр жылдары маусымаралық кезеңде көкөніс, қант және астық өнімдеріне осындай жеңілдіктер беріліп келеді. Мұндай шешімдер тапшылық мәселесін шешуге, әсіресе картоп, пияз, сәбіз сияқты «әлеуметтік» көкөністердің бағасын тұрақтандыруға тікелей әрі тиімді әсер етеді. Нарыққа сырттан қосымша өнім келуі тапшылық қаупін сейілтіп, бағаның негізсіз өсуіне жол бермейді. Бұған дейінгі жылдары Қазақстанда картоп пен пиязға қатысты дәл осындай жағдай қайталанған болатын. Қордың таусылуы және фермерлердің маусымаралық тұрақсыздық кезінде әлеуметтік маңызы бар өнімдерді көрші елдерге экспорттап, барынша пайда көруге тырысуы қарапайым көкөністердің бағасын аспандатып жіберген еді. Дегенмен, бұл шешім уақытша ғана амал екенін түсіну керек. Ол жыл сайынғы маусымаралық тапшылықтың түпкі себебін — өнімді сақтау, өңдеу инфрақұрылымының әлсіздігі мен егінді жоспарлаудағы олқылықтарды жоя алмайды. Бұл енді ЕАЭО-ға емес, Қазақстан Үкіметіне қойылатын талап.
