Қазақстан Халық партиясының YouTube арнасындағы OnAir бағдарламасында Қазақстандағы инвестициялық саясаттың жаңа кезеңіне арналған шығарылымда «Талап» қолданбалы зерттеулер орталығының директоры Асқар Қысықовтың сөзін келтірді: «Инвестиция тарту жүйесінің “бір терезе” қағидаты бойынша жұмыс істемейтіні туралы мәселе көптен бері көтеріліп келеді. Инвесторлар елге келген кезде, саяси деңгейде ауқымды жұмыс атқарылады, бұл үдеріс көбінесе ел басшылығының деңгейінде жүзеге асады. Қазақстан шетелдің негізгі инвестор елдерімен жақсы қарым-қатынас орнатқан. Алайда жоғары деңгейдегі келіссөздерден кейін инвестор нақты іске кірісіп, жер алу, құжат рәсімдеу секілді кезеңдерге келгенде, әртүрлі мемлекеттік органдар тарапынан бірқатар кедергілерге тап болады. Мұндай мәселелердің түп-төркіні – мемлекеттік реттеудің күрделілігі, жергілікті атқарушы органдар мен салалық ведомстволардың жұмысына байланысты. Осыған орай, стратегиялық маңызды инвесторлар үшін әкімшілік кедергілерді азайтып, қажетті рұқсаттарды жедел беруге мүмкіндік беретін “бір терезе” қағидатына негізделген жеңілдетілген тәртіп – “жасыл дәліз” қажет екені бұрыннан белгілі. Үкімет жанындағы инвестициялық штаб жұмыс істеп жатқанымен, шынайы өмірде бұл жүйе тиімді әрі толыққанды “бір терезе” ретінде жұмыс істемейді», – деді «Талап» қолданбалы зерттеулер орталығының директоры Асқар Қысықов.
Евразия24 пікірі:
Қазақстан халқына соңғы Жолдауында Мемлекет басшысы Бас прокуратура жанындағы «Активтерді қайтару жөніндегі комитетті» «Инвесторлардың құқықтарын қорғау комитеті» деп қайта атау қажет екенін айтты. Бұл – орынды шешім. Себебі прокуратура арнайы комитетсіз-ақ еліміздегі инвесторлардың құқықтары мен мүдделерін қорғауда белсенді жұмыс жүргізіп келеді. Қазіргі уақытта прокурорлардың бақылауында жалпы құны 64 трлн теңге болатын 1130 маңызды инвестициялық жоба бар. 2023 жылғы сәуірден бері прокуратура 800-ге жуық күрделі мәселені шешіп, 1350-ден астам инвесторға, оның ішінде шетелдік кәсіпкерлерге (Франция, Түркия, Қытай, Сингапур және басқа елдерден) нақты көмек көрсетті. Генпрокуратураның мәліметінше, шетелдік және отандық инвесторлардың Қазақстан экономикасына құйған инвестиция көлемі 10 триллион теңгеден асады. Ведомство өкілдері атап өткендей, инвесторларға қатысты мемлекеттік органдардың кез келген әрекеті – сотқа талап қою, қызметін тоқтату, лицензияны қайтарып алу немесе келісімшартты бұзу сияқты шешімдер – прокуратураның бақылауынан өтеді. Алайда бұл бағыттағы функциялардың әртүрлі мемлекеттік органдар арасында бөлінуі шетелдік әріптестермен жұмыс кезінде ақпарат алмасу мен үйлесімділікті қиындатып отыр. Мұндай келеңсіздіктердің алдын алу үшін барлық рұқсат беру және бақылау-қадағалау тетіктерін бір орталықтан басқару ұсынылып отыр.
