ҚР Үкіметі хабарлайды: «Минск қаласында Қазақстан Республикасының Премьер-министрі Олжас Бектенов ТМД Үкімет басшылары кеңесінің және Еуразиялық үкіметаралық кеңестің отырыстарына қатысушы делегациялармен бірге Беларусь Республикасы Президенті Александр Лукашенкомен өткен ортақ кездесуге, сондай-ақ ЕҮАК-тың тар және кеңейтілген құрамдағы отырыстарына қатысты. (…) «Қазақстан Президенті Қасым-Жомарт Кемелұлы Тоқаев жуырдағы Жолдауында елімізді алдағы үш жылда шын мәніндегі цифрлық мемлекетке айналдыру жөнінде стратегиялық міндет қойды. Қазіргі уақытта Қазақстан Үкіметі цифрландыруды дамыту, жасанды интеллект технологияларын енгізу бағытында белсенді жұмыс жүргізуде. Жақын уақытта біз Alem.ai халықаралық жасанды интеллект орталығын ашуды жоспарлап отырмыз. Бұл орталық цифрлық экономиканы, креативті индустрияны ілгерілетуге және жасанды интеллект экожүйесін қалыптастыруға қозғаушы күш болады. Қазақстандық IT шешімдердің экспортын арттыру бағытында да жұмыс жүргізілуде. Барша әріптестерді жасанды интеллект саласындағы жобаларды бірлесіп іске асыруға шақырамын. Бұл бастама әзірленіп жатқан Жол картасында елеулі орын алуы тиіс», – деді Олжас Бектенов. Еуразиялық үкіметаралық кеңестің отырысы қорытындысы бойынша бірқатар құжаттарға қол қойылды. Қабылданған шешімдер өнеркәсіптік және агроөнеркәсіптік кооперацияны дамытуға, өзара іс-қимылдың цифрлық құралдарын жетілдіруге, өткізу нарықтарын кеңейтуге және Одаққа мүше мемлекеттердің экономикаларының тұрақтылығын нығайтуға бағытталған.
Евразия24 пікірі:
Бірнеше күн бұрын «Хабар» телеарнасында Еуразиялық экономикалық одақ (ЕАЭО) аясында жұмыс істеп жатқан қазақстандық сүт өнімдерін өндірушілердің жағдайына қатысты қызықты сюжет көрсетілді. Онда сала өкілдері бәсекелес елдер тарапынан демпингке ұшырап, теңсіз жағдайда қалғандарын айтты. Ақмола облысындағы ірі сүт өңдеу кәсіпорнының басшысы бұл жағдайды ашық түсіндіріп берді: «Бүгінде Беларусь пен Ресей тарапынан демпингтің болу себебі — бұл елдерде шикізаттың бағасы бізбен салыстырғанда әлдеқайда төмен. Өйткені оларда мал азығын дайындау тәсілі басқаша, электр энергиясы мен жанар-жағармай арзанырақ. Сонымен қатар, көршілес мемлекеттерде мемлекет тарапынан көрсетілетін қолдау шараларының тетіктері де өзгеше. Мысалы, Ресейде фермерлерге «егістен сөреге дейін» еркін әрі жеңілдетілген мүмкіндік берілген». Бұл сюжет отандық сүт өндірушілердің ЕАЭО ішіндегі бәсекеге қабілеттілігіне қатысты жүйелі мәселелерді ашық көтерді. ЕАЭО елдеріне өнім экспорттағысы келетіндерге логистика шығындары да өтеледі. Басқаша айтқанда, бұл елдердегі агроcубсидия көлемі әлдеқайда ауқымды. Ал шығынға бататын – біз. Өз елімізде де, ЕАЭО нарығында да. Мұндай ақпаратты тіпті «Хабар» арнасының көрсетуі Ауыл шаруашылығы және Сауда министрліктерін ойландыратыны сөзсіз. Шын мәнінде, интеграциялық бірлестік шеңберіндегі жағдай ресми баяндамалардағыдай біркелкі әрі оң болып отыр ма? Сүт – тек бір ғана мысал. Өзге өнім түрлеріне қатысты да осындай өндіруші тараптың наразылығын кездестіруге болады. Мүмкін, Минскіде өткен Еуразиялық үкіметаралық кеңесте, онда Премьер-Министр Олжас Бектенов те қатысқан, бұл мәселе көтерілген шығар. Алайда ресми ақпараттарда бұл туралы ешбір нақты мәлімет айтылмайды.
