ҚР Сыртқы істер министрлігі хабарлайды: «Қазақстан Республикасы Сыртқы істер министрінің орынбасары Әлібек Қуантиров пен «Kazakh Invest» ұлттық компаниясы» АҚ басқарма төрағасының орынбасары Мадияр Сұлтанбек «Zhongyoung Power (Yunxi) Group Co., Ltd.» компаниясының бас директоры Ли Цзяньцзяньмен кездесу өткізді. Келіссөз барысында компания Қазақстанның электр энергетикасы инфрақұрылымын жаңғырту жобаларына инвестор ретінде қатысуға мүдделі екенін білдірді. Ли Цзяньцзянь «Zhongyoung Power» компаниясы инвестиция салу кезінде мемлекеттік-жекеменшік әріптестік (МЖӘ) тетіктері мен тарифтік модель арқылы инвестицияны қайтару жолдарын қарастыруға дайын екенін атап өтті. Бұл тәсіл инфрақұрылымдық жобаларды қаржыландырудың халықаралық тәжірибесіне сәйкес келеді. Сондай-ақ ол жобаларды іске асыру кезінде Қазақстанда өндірілген өнімдерді, соның ішінде трансформаторлар мен жергілікті кәсіпорындардың өзге де жабдықтарын пайдалану көзделетінін жеткізді. Тараптар компанияны қосалқы стансаларды жаңғырту, тозған жабдықты ауыстыру, жаңа трансформаторлық қуат көздерін салу және орта әрі жоғары кернеулі желілерге заманауи шешімдерді енгізу жобаларына тарту мүмкіндігін талқылады».
Евразия24 пікірі:
Келісімге қатысушы қазақстандық тараптың оптимизмін ішінара түсінеміз – жоғары дәрежеде тозығы жеткен энергетика саласы шекті мүмкіндіктермен жұмыс істеуде, сондықтан жаңа инвесторлар бұл салаға оң ықпал етуі мүмкін. Алайда қытайлық өндірушінің Қазақстан нарығына кіру шарттары алаңдаушылық тудыруда. Мемлекеттік-жекеменшік әріптестік (МЖӘ) пен тарифтік механизмдерді қамтитын ұсынылып отырған формат, үлкен ықтималдықпен, ақырғы тұтынушылар үшін тарифтердің өсуіне алып келуі мүмкін. Егер отандық инвесторлармен үкімет тарапынан жоспарланған тарифтік өсімді кейінге шегеру арқылы келісу мүмкін болса, шетелдік әріптестермен мұндай тәсіл іске аспайды. Мұндай келісімшарттар, әдетте, ұзақ мерзімге жасалып, инвестицияны қайтару шарттары алдын ала анықталады. Сонымен қатар, қандай да бір экономикалық күйзеліс жағдайында (мысалы, қазан айындағы инфляцияға ұқсас) шетелдік инвестордың тарифтік әрекеттеріне шектеу қоюға баруға үкімет ішінде саяси жауапкершілікті мойнына алатын тұлға табыла қоюы екіталай. Тағы бір маңызды тәуекел – инвестиция шетел валютасымен жүзеге асырылып, ал тарифтер теңгемен белгіленсе, валюта бағамдарының өзгеруін тек қызмет құнының қайта қаралуы арқылы ғана өтеуге тура келеді. Бұл жүктеменің барлығы ақыр соңында тұтынушылардың мойнына түседі. Қазақ тарапы инвестор тарту мақсатында қандай талаптарға келісім беретіні қызығушылық тудыратын маңызды сұрақ.
