Қазақстан Республикасы Үкіметінің Түркі мемлекеттері ұйымына (ТМҰ) мүше елдердің Үкімет басшылары кездесуінен ресми хабарламасы: ТМҰ мемлекет басшылары берген тапсырмалардың орындалу барысы қаралды. Жиында өңірлік және жаһандық сын-қатерлер жағдайындағы өзара іс-қимыл, сауда-экономикалық және инвестициялық байланыстарды кеңейту перспективалары талқыланды. Сондай-ақ көлік инфрақұрылымын дамыту, «Орта дәліздің» цифрлық интеграциясы және энергетикалық қауіпсіздікті нығайту мәселелеріне баса назар аударылды. ҚР Премьер-министрі Олжас Бектенов өз сөзінде экономикалық ынтымақтастықты нығайту мен бірлескен күш-жігерді үйлестірудегі ТМҰ-ның өсіп келе жатқан рөлін атап өтті. «Қазақстан Президенті Қасым-Жомарт Кемелұлы Тоқаев атап өткендей, бүгінде әлемдік қоғамдастық Түркі мемлекеттері ұйымын күрделі сын-қатерлерге төтеп бере алатын беделді әрі тұтас бірлестік ретінде таниды. Ұйымның негізін қалаушы елдердің бірі ретінде біз түркі интеграциясын бастан-аяқ ұзақ мерзімді, прагматикалық және экономикалық бағыттағы процесс ретінде қарастырамыз. 2025 жылдың қорытындысы бойынша Қазақстанның Ұйымға мүше елдермен өзара сауда айналымы 12,9 млрд долларға жетті. Біз бірлестігіміздің барлық әлеуетін пайдалана отырып, сауда-экономикалық және инвестициялық байланыстарды одан әрі тереңдетуге мүдделіміз», — деді Олжас Бектенов.
Сонымен қатар, Түркі елдерінің Сауда-өнеркәсіп палаталары одағының жұмысын жандандырып, оның Түркі инвестициялық қорымен тығыз үйлесімде әрекет ету қажеттігі айтылды. Бұл қадам ТМҰ экономикалық институттарының өзара ықпалдастық тиімділігін арттыруға септігін тигізбек.
Еуразия24 пікірі:
ТМҰ біртіндеп бастапқы саяси алаң сипатынан нақты экономикалық мазмұнға ие, практикалық нәтижеге бағытталған құрылымға айналып келеді. Нақты бағыттарға — сауда, инвестиция, көлік, цифрландыру — басымдық берілуі түркі интеграциясының қолданбалы сипатын айқын көрсетеді. Орта дәлізді дамытуға ерекше назар аударылуы да заңды. Бұл тек инфрақұрылымдық жоба емес, Қазақстанның транзиттік әлеуетін күшейтетін және Еуропа мен Азия нарықтарын байланыстыратын стратегиялық бағыт. Өзара сауда көлемінің 12,9 млрд АҚШ долларына дейін өсуі — түркі елдері арасындағы ынтымақтастықтың нақты нәтижесін көрсететін маңызды көрсеткіш. Бұл ТМҰ аясында бизнес үшін нақты нарықтар қалыптасқанын аңғартады. Геосаяси тұрақсыздық жағдайында мұндай мүмкіндік интеграциялық үдерістерді одан әрі дамытуға негіз болады. Сауда-өнеркәсіп палаталары одақтары мен инвестициялық тетіктер арқылы өзара іс-қимылдың күшеюі ТМҰ шеңберіндегі ынтымақтастықты нақты жобалар деңгейіне шығаруға бағытталғанын көрсетеді. Яғни серіктестік тек декларациялар мен меморандумдармен шектелмей, нақты экономикалық мазмұнмен толықтырылып отыр.
