Алматыда 20 тамыз күні №33 бағыттағы автобуста болған жанжал жолаушылар үшін қауіпті жағдайға ұласа жаздады.
Екі ер адам арасындағы сөзге келіспеушілік төбелеске ұласқан. Кейін жанжалға үшінші адам араласып, қолына пышақ алған. Әлеуметтік желіде тараған видеодан әйелдердің айқайы мен шошынған балалардың жылаған дауысы естіледі . Желі қолданушылары жүргізушінің әрекетін де сынға алды. Ол автобусты тоқтатып, есікті ашқаннан кейін жолаушылардың барлығын көліктен түсіруге әрекет жасаған.
Алматы полициясы оқиғаға жедел ден қойды.
«Аталған дерек бойынша Түрксіб аудандық полиция басқармасы қылмыстық іс қозғады. Күдіктілер ұсталып, уақытша ұстау изоляторына қамалды. Төбелеске қатысушылардың әрекетіне заң аясында тиісті баға беріледі. Мұндай агрессияға және қоғамға қауіп төндіретін әрекеттерге жол берілмейді. Кінәлілер Қазақстан Республикасының заңнамасына сәйкес жауапқа тартылады», – деді Алматы қаласы Полиция департаментінің ресми өкілі Салтанат Әзірбек .
Осы оқиға тағы бір мәселені көтереді. Қазақстанда күш қолданумен байланысты қылмыстардың салдарын ғана қарастырмай, адамдарды шектен тыс агрессияға итермелейтін себептерді де жүйелі түрде зерттеу қажет емес пе? Қауіпті әрекетке барған адам жазасын өтегеннен кейін қоғамға қайта оралады. Алайда оның психологиялық жағдайына тиісті баға берілмеуі мүмкін. Сондықтан зорлық-зомбылық сипатындағы қылмыстарды тергеу кезінде психикалық денсаулық саласы мамандарының қорытындысын алу тәжірибесін енгізу мәселесін қарастырған жөн. Мұндай сараптама адамның өзі де аңғармаған мінез-құлық ерекшеліктерін немесе психологиялық проблемаларды дер кезінде анықтауға мүмкіндік беруі мүмкін.
