Қазақстан Республикасы Ұлттық ұланы хабарлауынша, құқықтық тәртіп әскерлерінде асыл тұқымды қызметтік иттердің саны артып келеді. Тек биылдың өзінде ҚР ІІМ Ұлттық ұланының 6654 әскери бөлімінің кинологиялық орталығында 42 асыл тұқымды күшік дүниеге келді. Олардың қатарында бельгиялық, голландиялық және неміс овчаркалары бар. Күшіктер болашақта жауынгерлік және қарауылдық қызмет атқаруға үйретіліп, азаматтардың қауіпсіздігі мен тыныштығын қамтамасыз етуге тартылады. Жыл басынан бері асыл тұқымды 12 күшік өзге әскери бөлімдердің қатарын толықтыру үшін жіберілген. Қазіргі уақытта кинологиялық орталықта шамамен 30 күшік бағып-күтілуде. Кинологиялық орталықтың қызмет бастығы, майор Жанторе Мендиозаровтың айтуынша, күшіктер алғашқы 45 күн бойы ана сүтімен қоректенеді, одан кейін біртіндеп құрғақ жемге көшіріледі. Осы кезеңнен соң оларды сыртқы ортаға бейімдеу басталады. Үш айлық жасқа жеткенде күшіктер кедергілер жолағына шығарылады. Бұл уақытта есту қабілетін дамытуға ерекше мән беріледі, сондықтан әр күшікке жеке ат қойылады. Кейін олар «отыр», «тұр», «жат» сияқты негізгі командаларға үйретіледі. Одан әрі тапсырмалар күрделендіріліп, иіс арқылы заттарды іздеу кезеңіне көшіріледі. Бүгінде Ұлттық ұлан қатарында мыңға жуық қызметтік ит қызмет атқарады. Биылғы жылдың он айында олардың көмегімен 120-дан астам құқық бұзушылық анықталған. Кинологиялық орталықта өсіп келе жатқан күшіктердің жаңа легі де осы маңызды міндеттерді атқаруды жалғастырмақ.
Евразия24 пікірі:
«Иттерден құралған арнайы бөлімшенің» болуы және төрттағанды сарбаздардың қатарын жүйелі түрде жаңартып отыру – күштік құрылымдардың кадрлық құрамын қалыптастырудағы сауатты әрі стратегиялық тәсілдің көрінісі. Қызметтік иттер санының артуы мен өз тұқымдық базасының болуы айрықша артықшылық саналады. Себебі бельгиялық, голландиялық және неміс овчаркалары иіс сезу қабілетінің жоғары деңгейімен және тез үйретілетіндігімен ерекшеленетін, қызметтік иттердің ең үздік тұқымдарының қатарына жатады. Әлемнің көптеген елдерінде қызметтік иттер күштік құрылымдарда баға жетпес міндеттерді атқарып келеді: күзет пен патрульдеуден бастап, қару-жарақ, есірткі, жарылғыш заттарды және із-түзсіз жоғалған адамдарды іздеуге дейін кең ауқымды жұмыстарды қамтиды. Қазақстанда төрттағанды қызметтік иттердің 2025 жылы 120 құқық бұзушылықты ашуға қатысуы – қылмысқа қарсы күресте олардың рөлінің қаншалықты маңызды екенін тағы бір мәрте дәлелдейді. Сонымен қатар құқық қорғау органдарының кинологиялық қызметі көрсеткен мінсіз әрі айрықша еңбектің жарқын мысалдарын да еске сала кеткен жөн. 2024 жылғы қазанда Ұлттық ұланның кинологиялық қызметінің аға маманы, қатардағы жауынгер Әлішер Сүлейменов өзінің қызметтік иті Зормен бірге жоғалған баланы тауып, есірткі таратумен айналысқан күдіктіні ұстады. 2024 жылғы қаңтар айында Қарағанды облысы полиция департаментінің кинологиялық қызметі қызметтік иттің көмегімен мектепке жете алмаған 9 жастағы баланы тапты. Ал 2022 жылы қызметтік ит Алматы маңындағы тауларда адасып кеткен ерлі-зайыпты туристерді аман алып қалды.
