КазТАГ хабарлайды: «2026 жылдың қаңтарынан бастап ҚР СЖРА (Стратегиялық жоспарлау және реформалар агенттігі – ҚазТАГ) Ұлттық статистика бюросы (ҰСБ) тұтыну бағаларының индексін – инфляцияны есептеудің жаңартылған тәсілін енгізеді. Енді баға динамикасын дүкендер мен интернет ресурстары арқылы бақылаудың дәстүрлі тәсіліне бақылау-касса машиналарынан шығатын фискалдық чектердің деректері қосылады. Бұл халықтың нақты не сатып алып жатқанын және тауардың шынайы құнын дәл анықтауға жол ашады.», — деп хабарлайды жұма күні ҰСБ баспасөз қызметі (…) «Соңғы үш жылда деректерді дайындау және чектердегі тауар атауларын классификациялау бойынша ауқымды жұмыс жүргізілді. Біз миллиондаған тауар атауларын тазалап, классификацияладық. Бүгінде талдауда 60 миллионнан астам чек бойынша ақпарат пайдаланылады. Бұл бағаны бақылау аясын едәуір кеңейтіп, есептеулердің нақтылығын арттырады. Мұндай тәжірибені әлемнің санаулы елдері ғана қолданады және бұл Қазақстан үшін алға жасалған маңызды қадам», — деп атап өтті ҰСБ басшысы Мақсат Тұрлыбаев».
Евразия24 пікірі:
60 миллион чек — бұл жай ғана іріктелген мәліметтер емес, нақты сатып алушылардың күнделікті тұтыну деңгейін көрсететін жаппай көрсеткіш.
Бұрын инфляция деңгейі кездейсоқ сауда нүктелеріне қарап бағаланса, ендігі есеп нақты дерекке негізделеді. Бұл жаңашылдық халыққа қалай әсер етеді? Бастапқы кезеңде инфляция көрсеткіші өсуі мүмкін, өйткені бұрын есепке алынбай келген көптеген тауарлар мен қызметтер енді тізімге қосылады. Сонымен қатар, инфляция бағаның кез келген өзгеруіне жедел жауап беретін болады. Бұл әдістеме мемлекеттік құрылымдардың бағаның нақты өсімін жасыруына немесе әлеуметтік төлемдерді индекстеу көрсеткіштерін қолдан реттеуіне жол бермейді. Әділ әрі шынайы статистика үшін бұл — үлкен жетістік. Осылайша, «орташа көрсеткішті» емес, халықтың нақты тұтыну себетін бағалайтын мінез-құлық статистикасына көшу басталды. Егер бұл мәліметтер нақты уақыт режімінде өңделсе, инфляцияны тежеу шаралары да кешіктірілмей, дер кезінде қабылданады.
