Дели. 12 қыркүйек. ИНТЕРФАКС – Үндістан билігі Қытаймен және солтүстік-шығыстағы өзге де елдермен шекаралас өңірлердегі қорғаныс қабілетін нығайту мақсатында ұзындығы 500 шақырым болатын теміржол желісін салуды көздеп отыр, деп хабарлайды Bloomberg дереккөздерге сілтеме жасап.
Басылымның мәліметінше, мақұлданған жоба шеңберінде Қытай, Бангладеш, Мьянма және Бутанмен шекаралас шалғай аймақтарды байланыстыратын теміржол бағыты салынады. Инфрақұрылым құрамына көпірлер мен туннельдер де кіреді.
Bloomberg атап өткендей, Қытаймен арадағы қазіргі қарым-қатынас біршама тұрақталғанымен, Үндістан алдағы ықтимал шиеленістердің алдын алу үшін шекара бойындағы инфрақұрылымды күшейтіп жатыр. Бұл жоба әскердің шекараға жедел жетуін қамтамасыз етіп, тасымал үдерістерін жылдамдатып, әскери дайындық деңгейін арттырады.
Агенттік дереккөздерінің айтуынша, бастаманың жалпы құны шамамен 3,4 миллиард долларды құрауы мүмкін, ал құрылыс жұмыстары төрт жылға созылады. Жоба қажет болған жағдайда әскерді жедел жұмылдыруды және логистика жүйесін жетілдіруді мақсат етеді.
Сондай-ақ, Үндістан солтүстік-шығыс аймақтардағы бұған дейін пайдаланудан алынған бірқатар әскери әуе инфрақұрылымын қайта іске қосты. Бұл тізімге әскери авиация мен тікұшақ қонатын алаңдар кіреді. Сонымен қатар, Ладакх одақтас аумағында жаңа теміржол жобаларын іске асыру мәселесі талқылануда.
Премьер-министр Нарендра Моди шекаралық әлсіз аймақтарда көлік инфрақұрылымын дамытуды стратегиялық басымдық ретінде айқындаған. Бұған дейін ел билігі Пәкістанмен шекара бойында 1450 шақырымдық жол төсеп, Үндістан, Қытай және Бутан арасындағы даулы аймақ — Доклам жотасындағы инфрақұрылымды жаңғыртқан еді.
2024 жылдың маусымында Моди Кашмир алқабын елдің өзге өңірлерімен байланыстыратын әлемдегі ең биік теміржол нысаны — Чинаб көпірін ресми түрде ашты.
Bloomberg хабарлауынша, Қытай да шекараға жақын аумақтарда инфрақұрылымын белсенді түрде жаңартып жатыр. Атап айтқанда, жаңа әуежайлар мен әскери мақсатта қолдануға болатын тікұшақ алаңдары салынуда.
Айта кетейік, 2020 жылдың мамырында Ладакх аймағында Қытай мен Үндістан әскери күштері арасында қақтығыстар басталып, тараптар шекарадағы әскери қатысуын күшейткен болатын. 2022 жылдың желтоқсанында Аруначал-Прадеш штатының аумағында да екі ел әскерилері арасында қақтығыс тіркелген.
2024 жылдың қазанында премьер-министр Нарендра Моди мен ҚХР төрағасы Си Цзиньпин Линия фактілік бақылауы (LAC) бойында бейбіт ахуалды сақтау қажеттігін мойындады. Тамыз айында Моди Қытай сыртқы істер министрі Ван Имен кездесіп, шекаралық қауіпсіздік саласындағы ынтымақтастықты нығайтуға келісті.
