Қазақстан Республикасының Бас прокуратурасы хабарлайды: Алматы қаласының прокуратурасы қала прокуроры Серік Қаріпбековтің және Yandex Qazaqstan компаниясының басшысы Тимур Шалекеновтің қатысуымен алимент төлеуден жалтаруға қарсы іс-қимыл және балалардың құқықтарын қорғау жөніндегі ынтымақтастық туралы меморандумға қол қойды. Қала прокурорының айтуынша, қабылданып жатқан шараларға қарамастан, тәжірибеде алимент төлеуден әдейі жалтарушылардың нақты табыстарын жасыру деректері анықталып отыр. Мұндай тұлғалар ресми түрде жұмыссыз ретінде тіркелгенімен, іс жүзінде цифрлық платформалар арқылы, соның ішінде Yandex Taxi сервистері арқылы табыс табады. 2025 жылы осындай 110 дерек анықталған. Оның ішінде 57 адамға қатысты әкімшілік ықпал ету шаралары қолданылып, 10 дерек бойынша сотқа дейінгі тергеп-тексеру басталды. Қол қойылған меморандум заң аясында жүйелі ақпараттық өзара іс-қимылды, деректермен жедел алмасуды, сондай-ақ табысты жасыру және алименттік берешектің қалыптасу фактілерін анықтау мен алдын алуға жәрдемдесуді көздейді. Аталған келісім балалардың құқықтарын қорғауға, алименттік міндеттемелердің бұлтартпай орындалуын қамтамасыз етуге және мемлекет пен әлеуметтік жауапты бизнестің өзара тиімді серіктестігін дамытуға бағытталған.
Еуразия24 пікірі:
2025 жылы сәуір айында Әділет министрі Ерлан Сәрсембаев Мәжілістегі Үкімет сағаты барысында алимент төлеуден жалтарған, цифрлық агрегаторлар арқылы жұмыс істейтін борышкерлердің жасырын табыстарын анықтау жөніндегі жұмыстың басталғанын мәлімдеген болатын. Министрдің айтуынша, алимент берешегін өндіріп алу үшін өзге де ықтимал табыс көздерін айқындау және оларды заңды түрде пайдалану мүмкіндіктері талданып жатыр. Сонымен қатар Конституциялық соттың нормативтік қаулысында кәсіпкерлік қызметпен айналысатын тұлғалардан алимент есептеу және өндіріп алу тәртібін жетілдіру қажеттігі атап өтілген. Осы ұсынымдарды іске асыру аясында «Неке және отбасы туралы» кодекске өзгерістер әзірленіп, жеке кәсіпкер ретінде тіркелген борышкерлер үшін алимент мөлшерін соттың тұрақты ақшалай сома түрінде белгілеуі көзделген. Алайда қоғамдық талқылауларда сот орындаушылары жиі сынға ұшырап жүр. Оларға алимент төлемей жүрген, көлеңкелі табыс табатын борышкерлердің нақты кірістерін анықтауға шамадан тыс көп уақыт жұмсайтыны, соның салдарынан алимент төлемдері көбіне нақты табысқа емес, орташа жалақы мөлшеріне қарай есептелетіні айтылуда. Осы жағдайда мәселені түбегейлі шешу жолдары қандай болуы мүмкін? Мәселен, сот орындаушыларына алимент төлеуден жалтарушылардың банк шоттарындағы қаржы қозғалысы туралы ақпаратқа заңды қолжетімділік беру бұл проблеманы едәуір жеңілдетер ме еді? Бұл сұрақ алимент өндіріп алу жүйесін одан әрі жетілдіру қажеттігін тағы да күн тәртібіне шығарып отыр.
