Лондон. 14 шілде. ИНТЕРФАКС – Германия қорғаныс министрі Борис Писториус Financial Times басылымына берген сұхбатында елдің әскери-өнеркәсіптік кешені Қорғаныс министрлігінің сұраныстарын толық орындауға қауқарсыз екенін мойындады. Осыған байланысты Германия Украинаға алыс қашықтықтағы Taurus зымырандарын жеткізбейді.
Басылым былай деп жазады: «Писториус Германия өзінің Taurus зымырандарын Украинаға бермейтінін мәлімдеді».
Сонымен қатар министр қару-жарақ өндірушілерін «шағымдануды доғарып», өндіріс көлемін арттыруға шақырды. Оның айтуынша, үкімет әскери шығындарды жүздеген миллиард еуроға дейін ұлғайтып, қаржыландыруды оңтайландырған.
«Сала өкілдері енді өздеріне жүктелген міндеттердің орындалуына жауапты екенін жақсы біледі», – деді Писториус.
Министрдің мәлімдеуінше, ведомство нақты жобалар бойынша, бәрі шешілгендей көрінгенімен, өндіріс тарапынан кейінге шегерулерге жиі тап болады. Бұл қиындықтар оқ-дәрі, ұшқышсыз аппараттар, танктер – яғни, әскери техниканың дерлік барлық түріне қатысты.
Писториус Германияның қолында бар болғаны алты Patriot жүйесі қалғанын, оның біреуі техникалық қызмет көрсету немесе дайындық мақсатында тұрақты түрде қолжетімсіз екенін атап өтті.
«Бұл – расымен тым аз. Әсіресе НАТО шеңберінде алдымызға қойылған әлеуетті арттыру міндеттерін ескерсек. Біз бұдан артық ештеңе ұсына алмаймыз», – деді Германия қорғаныс министрі.
