АҚШ-тың ЕО тауарларына қатысты жаңа баж салығы Германия экономикасына қауіп төндіреді – Мерц
Берлин. 14 шілде. ИНТЕРФАКС – Германия канцлері Фридрих Мерц АҚШ президенті Дональд Трамптың Еуропа Одағы елдерінен импортталатын тауарларға жаңа баж салығын енгізу бастамасына алаңдаушылық білдірді. Bloomberg агенттігінің хабарлауынша, бұл шешім Германияның экспорттық салаларына елеулі соққы болмақ.
ARD телеарнасына берген сұхбатында: «Бұл бастама бүкіл жағдайды қиындатып, Германияның экспортқа бағытталған өндіріс салаларына тікелей әсер етеді», – деді Мерц.
Канцлердің айтуынша, Еуроодақ елдерінің басшыларымен бұл мәселеге байланысты тығыз келіссөздер жүргізіліп жатыр. Ол мұндай жағдайда екі негізгі шарттың маңызды екенін атап өтті: ЕО ішіндегі бірлік пен АҚШ президентімен сындарлы қатынас.
Фридрих Мерц сонымен бірге Еуроодақ тарапынан америкалық тауарларға қарсы шаралар қабылдау мүмкіндігін қолдайтынын айтты, бірақ мұндай қадамның «1 тамыздан бұрын» жасалмауы керектігін ескертті.
Еске сала кетейік, сенбі күні Дональд Трамп 1 тамыздан бастап ЕО елдерінен импортталатын тауарларға 30 пайыздық баж салығы салынатынын мәлімдеген болатын.
«1 тамыздан бастап біз Еуроодақ елдерінен келетін тауарларға 30% баж салығын енгіземіз. Бұл – ЕО-мен арадағы сауда теңгерімсіздігін жою үшін қажет», – деп жазды ол. Сонымен қатар Трамп келіссөздерге дайын екенін де жеткізді.
