Астана. 14 шілде. ИНТЕРФАКС-ҚАЗАҚСТАН – Қазақстан бойынша газдандыру деңгейі 62,4%-ға жетті. Бұл туралы «QazaqGaz» ұлттық компаниясы басқармасының төрағасы Санжар Жаркешов Мемлекет басшысы Қасым-Жомарт Тоқаевқа баяндады.
Ақорданың баспасөз қызметі хабарлағандай, дүйсенбі күні Президент ұлттық компания басшысын қабылдап, оның қызметінің негізгі нәтижелерімен танысты.
«Президентке бүгінгі таңда елдегі газдандыру деңгейі 62,4%-ға жеткені жөнінде баяндалды. Соңғы үш жылда 1,7 миллионнан астам адам газға қол жеткізді», – делінген кездесу қорытындысы бойынша таратылған хабарламада.
Мемлекет басшысына Жетісу облысындағы 66 елді мекенге газ жеткізуді қамтамасыз ететін Талдықорған – Үшарал газ құбырының желілік бөлігі құрылысының аяқталғаны туралы да мәлімет берілді. Сондай-ақ Бейнеу – Бозой – Шымкент магистральды газ құбырының екінші желісі мен Қашаған кен орнында сұйытылған мұнай газын тасымалдау және фракциялау зауытының құрылысы басталғаны айтылды. Бұған қоса, түркиялық ESTA инвесторының қатысуымен құны $1,35 млрд болатын карбамид зауытының құрылысы жүзеге асырылып жатыр.
Санжар Жаркешовтің айтуынша, қол жеткізілген маңызды нәтижелердің бірі – Ресей газының Қазақстан арқылы Өзбекстанға транзит көлемінің артуы. Ол сондай-ақ «Орталық Азия – Орталық» магистральды газ құбырындағы күрделі жөндеу жұмыстарының барысы туралы баяндап, бұл жобаның Қазақстанның өңірлік энергетикалық хаб ретіндегі рөлін едәуір күшейтетінін жеткізді.
Мемлекет басшысының тапсырмасы бойынша газдың ресурстық базасын дамыту аясында бірқатар келісімдер жасалды. Атап айтқанда, «Аққұдық» және «Солтүстік-2» учаскелері бойынша жер қойнауын пайдалану келісімшарттары, сондай-ақ CNPC компаниясымен «Солтүстік-1» учаскесінде бірлескен барлау жүргізу туралы келісім жасалды.
Сонымен қатар, газ саласына NVIDIA-ның заманауи графикалық чиптеріндегі суперкомпьютерді пайдалану сияқты цифрлық шешімдер енгізілуде.
Кездесу соңында Президент алдағы жылыту маусымына дайындық және елдің газ әлеуетін жүйелі түрде арттыру бойынша бірқатар тапсырма берді.
