МӘСКЕУ. 18 қыркүйек. ИНТЕРФАКС – Қытайлық телекоммуникация алпауыты Huawei жасанды интеллектке арналған Atlas 950 деп аталатын жаңа суперкомпьютерлік кластерді таныстырды.
Компания директорлар кеңесі төрағасының орынбасары әрі қазіргі төраға міндетін атқарушы Эрик Сюйдың айтуынша, Atlas 950 құрамында 520 мыңнан астам Huawei Ascend чипі болады және ол 2026 жылдың төртінші тоқсанында нарыққа шығарылады.
Әрбір жүйенің өнімділігі Nvidia NVL144 жүйесінен 6,7 есе жоғары болмақ. Сюйдың мәлімдеуінше, Atlas 950 барлық көрсеткіш бойынша бәсекелестерінен алда және xAI компаниясының ең ірі суперкомпьютері Colossus-тан 1,3 есе қуатты болады. Осылайша, ол әлемдегі ең мықты кластерге айналады.
Бұдан бөлек, Huawei 2027 жылдың соңында 1 млн-нан астам Ascend процессорын біріктіретін одан да қуатты Atlas 960 кластерін іске қоспақ.
Айта кетейік, Financial Times дерегінше, Қытай билігі елдің жетекші технологиялық компанияларына Nvidia-ның жасанды интеллектке арналған чиптерін сатып алуға тыйым салған.
