Брюссель. 30 тамыз. ИНТЕРФАКС – Исландияның Еуропалық одаққа кіру жөніндегі келіссөздерді қайта бастау мәселесі бойынша өткен референдумына қатысқандардың жартысынан астамы бұл бастаманы қолдамады, деп хабарлады жексенбі күні Euractiv порталы.
Басылымның мәліметінше, референдумның ресми қорытындысы әлі жарияланған жоқ. Алайда алты сайлау округінің бесеуінен түскен алдын ала дерек бойынша, сайлаушылардың 52,5%-ы келіссөздерді қайта бастауға қарсы, ал 47,5%-ы қолдап дауыс берген.
Исландия премьер-министрі, «Социал-демократиялық альянс» партиясының төрағасы Криструн Фростадоуттир ЕО-мен келіссөздерді қайта бастауды қолдайтын саяси күштерді бастап отыр. Оның жақтастары еуро аймағына қосылу елдегі жоғары инфляция мәселесін шешуге көмектесуі мүмкін деп есептейді. Ал қарсы тарап ЕО-мен келіссөз жүргізуге Үкіметке өкілеттік беру елдің дербестігіне, бизнеске және балық шаруашылығына кері әсер етуі мүмкін екенін алға тартқан. Әсіресе балық шаруашылығы басты мәселелердің бірі саналады, өйткені бұл сала Исландия экспортының шамамен 40%-ын қамтамасыз етеді.
Euractiv дерегінше, ЕО басшылары қазан айында Брюссельде өтетін саммитте одақты алдағы уақытта кеңейтудің негізгі бағыттарын айқындауды жоспарлап отыр. ЕО басшылығы Исландияны Черногория секілді экономикасы шағындау елдердің бірімен қатар қабылдау мүмкіндігін қарастырған. Мұндай тәсіл ЕО мүшелігіне үміткер өзге мемлекеттер арасындағы күмәнді азайтады деп есептелген.
Сонымен қатар Исландия қазірдің өзінде ЕО заңнамасының едәуір бөлігін басшылыққа алады. Ел Еуропалық экономикалық аймаққа мүше және бірқатар ерекшелікті қоспағанда, Еуропаның бірыңғай нарығына қатысады.
Исландия 2009 жылы қаржы дағдарысы кезінде ЕО-ға мүше болуға өтініш берген, алайда 2013 жылы оны кері қайтарып алды. Ол кезде елдегі экономикалық жағдай тұрақтанып, биліктегі партия Еуроодақпен ықпалдастықты тереңдетпеу бағытын таңдаған еді.
2024 жылы билікке Еуропа елдерімен байланысты нығайтуды қолдайтын коалиция келгеннен кейін бұл мәселе қайта күн тәртібіне шықты. Коалициялық келісімде 2027 жылға дейін ЕО-ға кіру жөніндегі келіссөздерді қайта бастау мәселесін референдумға шығару көзделген.
