Дубай. 5 маусым. ИНТЕРФАКС – Жұма күні таңертең Израильдің Ливанның оңтүстігіндегі елді мекендерге жасаған соққылары салдарынан кемінде бес адам қаза тапты. Бұл туралы Al Jazeera хабарлады.
Ливан тарапының мәліметінше, тағы бірнеше адам жарақат алған. Сондай-ақ шабуылдар салдарынан тұрғын үйлер мен жолдар зақымданған.
Атап айтқанда, Израиль ЮНЕСКО-ның Бүкіләлемдік мұралар тізіміне енгізілген Тир қаласына соққы жасауды жалғастырған. Телеарна мәліметінше, шабуылдар қалалық ауруханалардың маңындағы инфрақұрылым нысандарына бағытталған.
Өз кезегінде Израиль қорғаныс армиясы Ливанның оңтүстігіндегі елді мекендердің тұрғындарын елдің солтүстігіне эвакуациялануға қайтадан шақырды.
Сонымен қатар Израиль билігі өткен аптада Хезболла ұйымының инженерлік бөлімшесінің командирі Абдул Харбтың жойылғанын мәлімдеді. Алайда ұйым әзірге бұл ақпаратты растаған жоқ.
Бұған дейін Ynet басылымы Израиль министрлер кабинеті Ливанмен бітім туралы келісімді дауысқа салмағанын хабарлаған болатын. Бұған келісім шарттарын Ливанда орналасқан «Хезболла» қозғалысының қабылдаудан бас тартуы себеп болған.
Осы аптада Израиль мен Ливан АҚШ-тың арағайындығымен атысты тоқтату режимін сақтау туралы келісімге келген. Келісім шарттарына сәйкес, «Хезболла» тарапынан шабуылдар толық тоқтатылуы тиіс. Алайда ұйым келіссөздерге қатыспағандықтан, бұл міндеттемелерді ресми түрде өз мойнына алған жоқ.
