Гонконг, 26 шілде. ИНТЕРФАКС. Таиланд қарулы күштерінің Камбоджа аумағына бағыттаған артиллериялық соққыларының салдарынан 10-нан адам қаза тауып, 70-тен астамы жарақат алды. Бұл туралы Khmer Times газеті Камбоджа Қорғаныс министрлігінің ресми өкілі Мали Сочеатқа сілтеме жасап хабарлады.
Ресми деректерге сәйкес, шабуыл нәтижесінде бес әскери қызметші мен сегіз бейбіт тұрғын қаза тапқан. Сонымен қатар, 21 әскери қызметші мен 50 азаматтық тұлға түрлі деңгейдегі жарақат алған.
Қауіпсіздік мақсатында төрт провинция аумағынан 35 800 адам эвакуацияланған.
Министрлік өкілі Таиланд тарапының әскери әрекеттері қақтығыс шекарасынан тыс аймақтарға да таралғанын хабарлады. Оның айтуынша, сенбі күні таңғы сағат 5:02-де Таиланд армиясы бірнеше елді мекенге бес ауыр артиллериялық снаряд жіберген. Аталған аймақтар қақтығыс ошағынан алыс орналасқан. Соққылардың нәтижесінде әскери нысандармен қатар азаматтық инфрақұрылым да зардап шеккен.
Бұған дейін, бейсенбі күні таңертең, Таиландтың Сурин провинциясында орналасқан, иелік мәселесі шешілмеген Та Муен Том тарихи ескерткіші маңында Камбоджа мен Таиланд күштері арасында қарулы қақтығыс орын алған. Тараптар бір-бірін әскери іс-қимылдарға арандатты деп айыптауда.
Малайзия Премьер-министрі Анвар Ибрагимнің мәлімдеуінше, екі ел билігі шекара бойында атысты тоқтату туралы келісімге келген. Алайда, шетелдік бұқаралық ақпарат құралдарының хабарлауынша, жұма күні де артиллериялық атыстар жалғасқан.
