Гонконг. 18 шілде. ИНТЕРФАКС – Солтүстік Корея Жапонияны Қорғаныс министрлігінің 2025 жылға арналған «Ақ кітабында» КХДР-ды, Қытай мен Ресейді «өзекті қауіп» ретінде көрсеткені үшін сынға алды. Бұл туралы КХДР Сыртқы істер министрлігі жанындағы Жапония мәселелері жөніндегі институттың саяси бөлімінің мәлімдемесінде айтылған, деп хабарлайды ЦТАК.
«Жапония “Ақ кітабында” тағы да біздің, Қытай мен Ресейдің әскери әлеуетін нығайтуға бағытталған заңды шараларымызды “өзекті қауіп” деп атады», – делінген мәлімдемеде.
Пхеньянның пікірінше, бұл – «Жапония тарапынан төнетін шынайы қатерді жасыруға арналған өрескел әрекет».
КХДР Жапонияны «ел аумағын АҚШ-тың Индо–Тынық мұхит стратегиясын жүзеге асыруға арналған әскери базаға айналдырып, өңірдегі жағдайды біртіндеп шиеленістіріп жатыр» деп айыптап отыр. Сонымен қатар Токионың елді әскери державаға айналдыруға ұмтылып отырғаны атап өтілген.
Сондай-ақ мәлімдемеде Жапонияның соңғы жылдары шетелдік алыс қашықтыққа арналған зымырандарды жедел сатып алып жатқаны және отандық баламаларын әзірлеуге кіріскені көрсетілген.
«Қазіргі ахуал КХДР-дың ядролық соғыс қатерін тежеу бағытындағы іс-қимылдары АҚШ пен оның одақтастары тарапынан күшейіп келе жатқан арандатушылық әрекеттерге қарсы тұруға, сондай-ақ өңірдегі стратегиялық тепе-теңдік пен тұрақтылықты сақтауға бағытталғанын дәлелдейді», – делінген құжатта.
Пхеньян Жапонияның әскери әлеуетін арттыруға бағытталған әрекеттері өңірдегі бейбітшілік пен қауіпсіздікке елеулі қауіп төндіреді деп санайды және аймақ елдері мен халықаралық қауымдастықты қырағылық танытуға шақырады.
Бұған дейін Жапония Қорғаныс министрлігінің 2025 жылға арналған «Ақ кітабын» жариялаған болатын. Құжатта Солтүстік Корея, Қытай және Ресей Жапония үшін «серьезді және жедел қауіп» ретінде сипатталған. Сонымен қатар Пхеньянның Ресеймен әскери ынтымақтастығы аясында ядролық және зымыран технологияларына қол жеткізуі мүмкін екеніне байланысты алаңдаушылық білдірген.
