Мәскеу. 18 шілде. ИНТЕРФАКС – БҰҰ жанындағы Ресейдің тұрақты өкілі Василий Небензя Сирия жөніндегі Қауіпсіздік Кеңесінің отырысында, елдің оңтүстігінде үкімет күштері мен друздар арасында қарулы қақтығыс болғаннан кейін, Дамасктан Ресей азаматтары мен нысандарының қауіпсіздігін қамтамасыз етуді талап етті.
«Осыған байланысты Сириядағы ресейлік азаматтар мен нысандардың қауіпсіздігін қамтамасыз ету – императивті міндет екенін еске саламыз. Сирия билігінен тиісті шаралар қабылдауды талап етеміз», – деді Небензя.
Дүйсенбі күні Сирияның Эс-Сувейда қаласында үкімет әскері мен друздар арасында қарулы қақтығыс болды. Ресми деректер бойынша, 34 адам қаза тапқан.
Сәрсенбіде Израиль әскері Сирия Қарулы күштері Бас штабының ғимараты мен Дамасктегі президент сарайына әуе соққыларын жасады. Израиль премьер-министрі Биньямин Нетаньяхудың айтуынша, Израильдің «Сирияның оңтүстік-батысындағы шекаралық демилитаризацияланған аймақты сақтау және жергілікті друз халқын қорғау» бойынша міндеттемелері бар.
Бейсенбі күні Сирия әскері Эс-Сувейда провинциясынан шығарылып, өңірде атысты тоқтату режимі енгізілді. Құқықтық тәртіпті қамтамасыз ету міндеті билік пен друз діни көшбасшыларынан құралған комитетке тапсырылды.
Жұмаға қараған түні Израиль авиациясы Эс-Сувейда провинциясына жаңа әуе соққыларын жасады. Сирияның уақытша президенті Ахмед аш-Шараа друздарды атысты тоқтату режимін бұзды деп айыптап, Израильдің Сирияның ішкі істеріне «өрескел араласуы» жағдайды одан әрі ушықтырып, өңірдегі хаос пен қирауды күшейтіп отырғанын мәлімдеді.
