АСТАНА. 8 қазан. ИНТЕРФАКС-ҚАЗАҚСТАН – Қазақстан Парламентінің Мәжілісі сәрсенбі күнгі жалпы отырыста «Құрылыс кодексі» жобасын және сәулет, қала құрылысы мен құрылыс салаларындағы мәселелер бойынша оған ілеспе түзетулерді бірінші оқылымда мақұлдады.
Индустрия және құрылыс министрі Ерсайын Нағаспаевтың айтуынша, бұдан былай әзірленетін немесе түзетілетін барлық қала құрылысы жобалары, соның ішінде егжей-тегжейлі жоспарлау жобасы (ЕЖЖ), міндетті түрде кешенді қала құрылысы сараптамасынан өтетін болады.
Министр бұл шаралардың мақсаты – құрылыс саласындағы қателіктер мен нормалардың бұзылуын болдырмау, сыбайлас жемқорлыққа жол бермеу, адами фактор әсерін азайту және құжат айналымының ашықтығы мен сақталуын қамтамасыз ету екенін атап өтті. Осылайша, барлық қала құрылысы құжаттары тексеріліп, қорғалатын бірыңғай цифрлық жүйе қалыптасады.
Сонымен қатар құрылыс саласында лицензия алған ұйымдардың (қазіргі таңда шамамен 80 мың) электронды тізімі жасалады. Бұл – саладағы тәртіпті нығайту және жалған компанияларды нарықтан шығару үшін қажет.
Кодекс жобасына берілген қорытындыда құрылыс сапасы мен қауіпсіздігін арттыру ұсынылған. Атап айтқанда, нысандардың кепілдік мерзімі 2 жылдан 5 жылға дейін ұзартылып, мүгедектігі бар адамдар үшін ғимараттардың қолжетімділігін қамтамасыз ету нормалары қарастырылған.
Мемлекеттік бақылау күшейтіліп, құрылыс саласындағы мамандарды міндетті сертификаттау енгізіледі және сейсмикалық қауіпті аймақтар үшін арнайы нормалар белгіленеді.
Құрылыс кодексі жобасында сейсмикалық қауіпсіздікке арналған жеке тарау енгізу көзделген. Онда құрылыс жұмыстарының барлық кезеңінде – жер телімін таңдаудан бастап, ғимаратты пайдалануға беруге дейін – жер сілкінісі қаупі ескерілуі тиіс екені айтылған. Жаңа нысандарды жобалауда сейсмоизоляциялық технологияларды қолдану және ғимараттарды сейсмотұрақтылыққа міндетті түрде сынақтан өткізу ұсынылады.
Ілеспе түзетулер заңнамалық қайшылықтарды жойып, реттеуші актілерді нақтылау және жеңілдету арқылы құрылыс саласының инвестициялық тартымдылығын арттыруды мақсат етеді.
