Брюссель. 8 қазан. ИНТЕРФАКС – Еуроодақ елдері тарапынан Ресейге қарсы әзірленіп жатқан 19-шы санкциялар пакетін қабылдау үдерісі Венгрия мен Словакияның ұстанымына байланысты созылуы мүмкін. Бұл туралы EUobserver басылымы ЕО дипломатиялық дереккөздеріне сілтеме жасап хабарлады.
Басылым таратқан мәліметке сәйкес, Будапешт Еуроодақ енгізбек болған Ресейден сұйытылған табиғи газ (СТГ) импортына тыйым салу шарасынан Венгрияны босатуды талап етіп отыр. Сонымен қатар, Словакия премьер-министрі Роберт Фицо 23 қазанда өтетін ЕО саммитінде санкциялар бойынша келіссөздердің жылдамдығына ықпал етуі мүмкін.
Алайда дипломаттардың айтуынша, бұған дейін де Роберт Фицо Еуроодақтан нақты құқықтық міндеттемелерді көздемейтін саяси уәделер алған соң, вето қою ниетінен бас тартқан жағдай болған.
Еске сала кетейік, 30 қыркүйекте Еурокомиссия төрағасы Урсула фон дер Ляйен Еуроодақтың Ресейге қысымды арттыруды жалғастыратынын мәлімдеген болатын. Оның айтуынша, бұл мақсатта Ресейден келетін сұйытылған газға қатысты шектеулерді қамтитын 19-санкциялар пакеті ұсынылады.
Аталған санкциялар пакетін қабылдау үшін ЕО-ға мүше барлық мемлекеттердің бірауыздан қолдауы қажет.
