Zakon.kz хабарлайды: 2025 жылғы 7 қазанда өткен Үкімет отырысында Қаржы мониторингі агенттігі төрағасының орынбасары Қайрат Бижанов дропперлермен күресудің жаңа тәсілдері туралы баяндады. Оның айтуынша, қазіргі таңда өзекті мәселелердің бірі – банкоматтарды қолма-қол ақшаға айналдыру схемаларында пайдалану. Бұл тәуекелдерді азайту үшін бірқатар шаралар әзірленген. Атап айтқанда, картаға 500 мың теңгеден астам сома түскен жағдайда, енді жіберушінің ЖСН-ін міндетті түрде көрсету талабы енгізіледі. Бұған дейін тек алушының ЖСН-і талап етілетін. «Қосымша қауіпсіздік ретінде операцияны мобильді қосымша немесе SMS арқылы растау мүмкіндігі қарастырылуда. Сонымен қатар, 2026 жылы 1 қаңтардан бастап банктер банкоматтардың бейнебақылау жазбаларын кемінде 180 күн сақтауға міндетті болады. Бұл күмәнді операцияларға қатысушыларды анықтауға мүмкіндік береді. Сондай-ақ бет-әлпетті немесе саусақ ізін тану секілді биометриялық сәйкестендіруді енгізу мүмкіндігі қарастырылуда», – деді АФМ төрағасының орынбасары.
Евразия24 пікірі:
Маусым айында Ұлттық банк өзінің «Экономикалық шолуын» жариялап, 2014–2024 жылдар аралығында айналымдағы қолма-қол ақшаның орташа жылдық өсімі 13%-ды құрағанын хабарлады. Осы кезеңде қолма-қол ақша көлемі 3,1 трлн теңгеге немесе 226%-ға артқан. Цифрлық сервистер кең таралғанына қарамастан, сарапшылар қолма-қол ақшаның сұранысқа ие болуын анонимділікке және бақылаудан тыс операцияларға ұмтылумен байланыстырады. АФМ банкомат арқылы картаға ақша салу тәртібіне бақылауды күшейтетінін мәлімдеді. Бұл ресми түрде дропперлікпен күрес шарасы ретінде ұсынылғанымен, шын мәнінде, мемлекет көлеңкелі айналымды бақылауға алуға ниетті. Жаңа талаптар халықтың қолма-қол ақшаға сұранысын одан әрі арттыруы мүмкін.
