Мәскеу. 4 қараша. ИНТЕРФАКС – Ресей президенті Владимир Путиннің айтуынша, Ресей өзге елдерге бұрын да қоқан-лоқы көрсетпеген, қазір де көрсетіп отырған жоқ. Ол елінің басқа мемлекеттермен ынтымақ орнатуға мүдделі екенін айтты.
Путин Ресей халқының бірлігін нығайтуға үлес қосқандарға президент сыйлығын, сондай-ақ мемлекеттік наградаларды табыстау рәсімінде марапат алған шетелдік өкілдерге сөз арнады. «Біріншіден, Ресей бұрын да ешкімге қоқан-лоқы көрсеткен емес, қазір де көрсетпейді. Екіншіден, біз өзге елдермен бірлесіп жұмыс істегіміз келеді. Әзірге бұған дайын емес жұрт та сіздерден және дүниенің әр түкпіріндегі өзге достарымыздан үлгі алып, дұрыс қорытынды жасар деп үміттенемін. Сонда олардың Ресейге көзқарасы да өзгеріп, бізбен текетіреске барудың орнына ынтымақтасуға ұмтылар», – деді ол.
«Біз мұндай ынтымақтастыққа дайынбыз, көздегеніміз де осы. Сіздерге және әлемнің қай түкпірінде жүрсе де, Ресеймен осындай қарым-қатынас орнатқысы келетін барша жанға рақмет», – деді Путин.
Ресей президенті шетелдік өкілдерге осы ұстанымы үшін ризашылығын білдіріп, алдағы бірлескен жұмыста да олардың көмегі мен қолдауына үміт артатынын айтты.
Путин марапат иелеріне өз елдері мен Ресей арасындағы байланысты нығайтып, халықтарды жақындастыруға қосқан үлесі үшін алғыс айтты. Оның сөзінше, мәдениет, білім, гуманитарлық және іскерлік салалардағы байланыстар елдердің саясат пен қауіпсіздік мәселелерінде де бірлесіп жұмыс істеуіне жол ашады.
